Hartak.am-ը գրում է.
Նկարիչ Դերիլ Ֆիցջերալդի (Daryl Fitzgerald) անձնական գրադարանում շատ հետաքրքիր հավաքածու կա, որն իրենից ներկայացնում է Literature Heavyweights(ծանրաքաշ գրականություն) անվանումով աղյուսե գրքերը:
Եվ իրականում այդպես է. աղյուսե գրքերի շարքում չես կարող բարակ գիրք գտնել, բոլորը հաստափոր և ծանր գրքեր են, որոնք հիմնականում դասավանդողները հանձնարարել են ընթերցել բարձր դասարանի աշակերտներին, ուսանողներին և բոլոր նրանց, ովքեր ինքնազարգացման ուղին են բռնել: Դրանցից մի քանիսը դժվարընթեռնելի են:
Տաղանդավոր նկարիչ և իլյուստրատոր Դերիլ Ֆիցջերալդը փողոցից հավաքել է աղյուսներ, աղյուսի կտորներ` վերածելով դրանք անտիկ, հնադարյան գրքերի, որոնք կզարդարեին ցանկացած գրքասերի գրադարանը:
Լ.Տոլստոյի «Պատերազմ և խաղաղություն», Օրուելի «1984», Քերոլլի «Ալիսան հրաշքների աշխարհում», Զիգմունդ Ֆրեյդի և այլ փիլիսոփաների ստեղծագործություններից բաղկացած աղյուսե գրադարանը զարմացնում է բոլորին: Ի դեպ, նկարիչը ընտրել է հենց իր սիրելի գրքերը: Ամենայն հավանականությամբ կարդացել է նա այդ գրքերը կամ պլանավորում է դա անել մոտակա ժամանակներս:
