«90 կմ երկարությամբ Մ6 Վանաձոր-Ալավերդի-Բագրատաշեն միջպետական ճանապարհի վերանորոգումը նախատեսված է իրականացնել երկու փուլով: Առաջին փուլում վերանորոգվում է Վանաձոր-Ալավերդի ճանապարհի 38,5 կմ երկարությամբ հատվածը, որն ընդգրկում է նաև միջպետական ճանապարհի երեք թունելներն ու կամուրջները: 2016թ. սեպտեմբերի 14-ից վերանորոգման նպատակով փակ էր միջպետական ավտոճանապարհի Վանաձոր-Ալավերդի հատվածը, ավտոտրանսպորտի երթևեկությունը կատարվում էր շրջանցիկ, Ստեփանավանով ձգվող ճանապարհով: 2016թ. սեպտեմբերից Վանաձոր-Ալավերդի ավտոճանապարհին մեծածավալ աշխատանքներ են կատարվել, թունելների երկարությունն ավելացվել է, դրանց ծածկը՝ ամրացվել, ճանապարհի ջրահեռացման աշխատանքներ կատարվել, շատ հատվածներում ասֆալտապատում է կատարվել, սակայն դեռ շատ աշխատանքներ կան կատարելու:
Լոռու մարզի Ձորագետ համայնքի տարածքում՝ միջպետական ավտոճանապարհի եզրին, ցուցանակ է տեղադրված, վրան գրված, թե Վանաձոր-Ալավերդի ավտոճանապարհի այդ հատվածի վերանորոգումը կավարտվի 2018թ. փետրվարի 20-ին:Որպես ճանապարհի այդ հատվածի կապալառու նշված են «Ճանապարհ» ՍՊԸ-ն և «Կամուրջշին» ՓԲԸ- ն: Ալավերդի-Վանաձոր ճանապարհի մեկ այլ հատվածում տեղադրված ցուցանակում որպես կապալառու նշված են «Արարատ ճանշին» և «Դորլիդեր» կազմակերպությունները, նշված ճանապարհահատվածի նորոգման վերջնաժամկետ նշված է 2018թ. մայիսի 1-ը: Արձանագրենք՝ վերջնաժամկետներն ավարտվել են: Սակայն միջպետական այդ ճանապարհի ոչ մի հատվածում ճանապարհի կառուցապատման աշխատանքներն ավարտված չեն, դեռ մեծ ծավալի աշխատանքներ պետք է իրականացվեն:
Հատկապես վատ է իրավիճակը Վանաձոր-Փամբակ հատվածում, ուր բազում փոսեր կան, ավտոտրանսպորտն այդ հատվածը հաղթահարում է ցածր արագությամբ: 2016թ. սեպտեմբերի 14-ից Վանաձոր-Ալավերդի հատվածում երթևեկությունը դադարեցվել էր, մինչ այդ Նոյեմբերյան-Վանաձոր երթուղու ավտոբուսի տոմսի գինը 900 դրամ էր, միկրոավտոբուսինը՝ 1200: Երբ հասարակական տրանսպորտը սկսեց երթևեկել շրջանցիկ, Ստեփանավանի ճանապարհով այդ երթուղու ավտոբուսի տոմսի գինը դարձավ 1200 դրամ, միկրոավտոբուսինը՝ 1500: Նոյեմբերյան-Վանաձոր և հակառակ ուղղությամբ ճանապարհը երթուղային ավտոբուսները և միկրոավտոբոաները այժմ անցնում են ոչ թե շրջանցիկ Ալավերդի-Ստեփանավան-Վանաձոր ճանապարհով, այլ Ալավերդի-Վանաձոր հիմնական, կիսավարտ, դժվարամատչելի ճանապարհով: Սակայն, այժմ ուղեվարձը գանձվում է շրջանցիկ ավտոճանապարհի համար՝ ավտոբուսների դեպքում՝ 1200, միկոավտոբուսների դեպքում՝ 1500 դրամ: Նոյեմբերյան-Վանաձոր և հակառակ ուղղությամբ մեկնող քաղաքացիները նշված ավտոճանապարհի կառուցապատման ժամկետների ուշացման պատճառով տուժում են կրկնակի, շատ ժամանակ և նյարդեր են կորցնում կիսաքանդ ճանապարհով անցնելու պատճառով և ավել գումար են վճարում ուղեվարձի համար»,-գրում է թերթը: