Tert.am-ը գրում է.
22:09
Նիկոլ Փաշինյանը ներկայացրեց վաղվա ծրագրերի օրակարգը:
«Վաղը՝ ժամը 19:00-ին, կրկին հավաքվում ենք Հանրապետության հրապարակում, իսկ մինչ այդ քաղաքացիական անհնազանդության գործողությունները սկսում ենք ժամը 12:00-ին»,- ասաց Փաշինյանը:
Հանրահավաքն ավարտվեց, քիչ հետո Հանրապետության հրապարակում կմեկնարկի համերգը: 
22:07
Որևէ բախում չի լինելու, ժողովուրդը հաղթել է, և այդ հաղթանակը պետք է ճանաչվի րոպե առաջ:
Այս մասին ասաց Նիկոլ Փաշինյանը:
«Այսօր չգիտեմ որ անպատասխանատու պաշտոնյան զրահամեքենա էր մտցրել փողոց: Այդ միջադեպն ավարտվեց զրահամեքենայի աշխատողների և քաղաքացիների միջև գրկախառնությամբ»,-ասաց Փաշինյանը: 
22:01
Մենք չենք ասում, որ վարչապետի ընտրությունը պետք է տեղի ունենա հրապարակում: Այս մասին հայտարարեց պատգամավոր Նիկոլ Փաշինյանը:
«Մենք ասում ենք, որ հրապարակը և ՀՀ ժողովուրդն ունի վարչապետի թեկնածու, և ԱԺ խմբակցությունները պետք է հաշվի նստեն այս քաղաքական իրողության հետ, առաջադրեն այդ թեկնածուին ու քվեարկությամբ ընտրեն այդ թեկնածուին»,- նշեց Ն. Փաշինյանը:
Փաշինյանը զգուշացրեց, որ Կարեն Կարապետյանը չհամարձակվի մուտք գործել կառավարական շենքեր:
«Ոստիկանության ու ոստիկանության պետի այսօրվա հայտարարությունները ուղղակիորեն նշանակում են, որ նրանք հրաժարվում են կատարել Կարեն Կարապետյանի որևէ հրաման»,- ասաց պատգամավորը:
21:52
Մենք պատրաստ ենք բանակցությունների: Դրանք, ինչպես նախկինում, այնպես էլ հիմա պետք է վերաբերեն իշխանության խաղաղ ու անցնցում փոխանցմանը:
Այս մասին Հրապարակում հայտարարեց պատգամավոր Նիկոլ Փաշինյանը:
«Այն ժամանակ, երբ իմ ու Կարեն Կարապետյանի միջև նշանակված էին բանակցությունները, մեզ զանգում էին ՀՀԿ-ական պատգամավորներ և ասում էին, որ խնդրում ենք հաշվի առնել, որ Կարեն Կարապետյանն այդ բանակցություններում մեզ չի ներկայացնում: Դրանից հետո մենք առաջարկել ենք, որ բանակցային ֆորմատին, քննարկումներին մասնակցեն Կարեն Կարապետյանը, Արա Բաբլոյանը, Վահրամ Բաղդասարյանը: Առաջարկել ենք, որովհետև ուզում ենք համոզվել, որ բանակցում ենք իշխող կուսակցության, ոչ թե նրա մի փոքր հատվածի հետ»,- ասաց պատգամավորը:
Նիկոլ Փաշինյանը հավաստիացրեց, թե այսօր էլ իրեն մոտեցան «ՀՀԿ» խմբակցության պատգամավորների ներկայացուցիչներ և պաշտոնապես ասացին, որ պատրաստ են քվեարկել վարչապետի՝ ժողովրդի թեկնածուի օգտին:
Ամբողջական հոդվածը կարող եք կարդալ այստեղ։
