Սկսվել են Սևակ Խանաղյանի եվրատեսիլյան տեսաբացիկի նկարահանումները

«Եվրատեսիլ 2018»-ը հյուրընկալող Պորտուգալիայում արդեն սկսվել են մրցույթի հայաստանյան պատվիրակ Սևակ Խանաղյանի տեսաբացիկի նկարահանումները։ Այս տարի եվրատեսիլյան տեսաբացիկները, որոնք եթեր են հեռարձակվում յուրաքանչյուր մասնակցի ելույթից առաջ, կներկայացնեն Պորտուգալիայի տեսարժան վայրերը, պատմական ժառանգությունն ու արվեստը մասնակից երկրների ներկայացուցիչների օգնությամբ։

«Անչափ ուրախ եմ, որ հնարավորություն ունեմ այստեղ լինելու մինչև մրցույթի սկիզբը։ Ճիշտ է, նկարահանումներն ընդամենը մեկ օր են տևում, բայց արդեն հասցրել եմ ծանոթանալ Պորտուգալիայի մշակույթին։ Տեսաբացիկների գաղափարը ևս շատ հետաքրքիր է, և կարծում եմ, հանդիսատեսին դուր կգա։ Նկարահանումներն ավարտելուն պես մեկնելու եմ Ամստերդամ՝ նախաեվրատեսիլյան մեծ համերգին մասնակցելու համար,- նշել է Սևակ  Խանաղյանը։ 

Հիշեցնենք, որ ապրիլի 7-ին սկսվեց Սևակ Խանաղյանի եվրատեսիլյան պրոմո շրջագայությունը։ Նա արդեն հասցրել է ելույթ ունենալ Մոկսկվայում և Թել Ավիվում տեղի ունեցած համերգների ընթացքում։ Այս շաբաթ Սևակ Խանաղյանը ելույթ կունենա Ամստերդամում, իսկ ապրիլի 21-ին՝ Մադրիդում։