Ռաֆայել Երանոսյանը նոր ֆոտոշարք ունի: Դերասանը մարմնավորել է աշխարհում ամենահայտնի գրական կերպարներից մեկին՝ Շերլոք Հոլմսին՝ Արթուր Կոնան Դոյլի ստեղծագործությունների նշանավոր հերոսին և աշխարհահռչակ խուզարկուին։ Ֆոտոշարքն արվել է վերջերս՝ Ամերիկայում եղած ժամանակ: BlogNews.am-ի հետ զրույցում դերասանը պատմեց, որ գաղափարը շատ պատահական է առաջացել:
«Համագործակցել եմ իմ լավագույն ընկերներից մեկի՝ Վահանի հետ։ Միասին որոշել ենք կերպարս ու 24 ժամում իրականացրել անհավանական գաղափարը: Առաջին անգամ էի աշխատում նրա հետ ու մեծ բավականություն ստացա: Միշտ ուզել եմ լուսանկարներիս ալբոմում այս ոճի նկարներ ունենալ»,- ասում է Ռաֆայելն ու հավելում, որ Շերլոքի հետ նմանություններ իրականում քիչ ունի. «Շնորհիվ իր բացառիկ խելքի և դեդուկտիվ-վերլուծական մտածողության՝ Շերլոք Հոլմսը համարվում է դետեկտիվ գրականության ամենահայտնի կերպարը, ում մասին ստեղծագործություններն ամենաշատն են էկրանավորվել: Իհարկե, հակում չունեմ փորփրելու կամ ինչ-որ բան բացահայտելու, բայց դե ինչ արած, ես էլ այդպիսին եմ: Նկարահանումներն ավարտեցինք, ու ես հասկացա, որ ինձանից կարելի է նաև այսպիսի կերպար ստանալ: Գուցե այս նկարները նպաստեն, որ լավ դետեկտիվ ֆիլմում նկարահանելու առաջարկ ստանամ (ծիծաղում է)»։
Ինչպես դերասանն է խոստովանում, իսկական ու հետաքրքիր աստղային կյանք է ապրել 24 ժամվա ընթացքում. «Այն տարածքում, որտեղ իրականացնում էինք ֆոտոշարքը, մարդաշատ էր: Բոլորը մոտենում ու նկարվում էին ինձ հետ, նույնիսկ ամերիկացիներն էին մոտենում և ասում, որ ինձ այս կամ այն դերասանին են նմանեցնում: Հետաքրքիր աստղային կյանք ապրեցի 24 ժամվա ընթացքում: Շատ հաճելի էր»:
Ներկայումս Ռաֆայելը բուռն ստեղծագործական շրջանում է, ակտիվ աշխատում է ոչ միայն Կամերային թատրոնի ներկայացումներում, այլև իր նոր՝ «Stand up» ներկայացման վրա, որի պրեմիերան կկայանա մայիսի 14-ին. «Այս պահին աշխատում եմ «Նազար, Նազար մինչև վերջ» ներկայացման վրա ու ևս մեկ ներկայացման մեջ եմ ընդգրկված: Իսկ ուշ երեկոներին Արմեն Վարդանյանի հետ գրում եմ «Stand up»-իս տեքստը: Չեմ ուզում ասել՝ նմանատիպը չունեցող ներկայացում է, բայց որ շատ հետաքրքիր է լինելու, դա՝ միանշանակ: Ասելիքս ոչ թե կուտակվել է իմ մեջ, ոչ թե բողոք է, այլ պոզիտիվ ու հետաքրքիր ժամանց եմ խոստանում: Շոշափելու եմ թեմաներ, որոնք կհետաքրքրեն և՛ 12 տարեկան երեխաներին, և՛ չափահասներին»,- եզրափակեց դերասանը: