Armsport.am-ը գրում է.
Ֆրանսիական «Նիսի» հարձակվող Մարիո Բալոտելին պատմել է Իտալիայում առկա ռասիսզմի մասին.
«Որոշ մարզադաշտերում մարդիկ բղավում էին ինձ. «Սևամորթ իտալացիներ չեն լինում», չնայած նրան, որ ես հակառակն եմ ապացուցում:
Եվ չնայած ես իտալացի եմ, ով ծնվել և մեծացել է Իտալիայում, օրենքով ես այդպիսին եմ դառնում միայն 18 տարեկանում:
Կարծում եմ, եթե ես սպիտակամորթ լինեի, ավելի քիչ խնդիրներ կունենայի:
Հնարավոր է` ինքս եմ մեղավոր իմ խնդիրների համար, եղել են ժամանակներ, երբ ինձ լավագույնս չեմ դրսևորել, բայց եթե ես սպիտակամորթ լինեի ինձ ավելի արագ կներե՞ին. միանգամայն, այո:
Իտալիան ռասիստական երկիր չէ, բայց այնտեղ կան ռասիստներ: Այդ ամենը փոխելու հնարավորությունը հաջորդ սերնդի ձեռքում է, և մենք մեր երեխաներին պետք է սովորեցնենք, որ բոլոր մարդիկ հավասար են` չնայած արտաքին տարբերություններին»,- Բալոտելիի խոսքերն է փոխանցում «Football Italia»-ն:
Հիշեցնենք` Բալոտելին ծնվել է իտալական Պալերմո քաղաքում գանացիների ընտանիքում, կարիերայի մեծ մասն անցկացրել է իտալական ակումբներում, հանդես է գալիս նաև Իտալիայի հավաքականում: