Միայն մեկ անգամ ու բացառապես կենդանի հնչողությամբ. երեկ հայ հանդիսատեսը հնարավորություն ունեցավ վայելելու աշխարհահռչակ լեգենդար խմբի՝ «Մոդերն Թոքինգ» բենդի սիրված ու չհնացող երգերը: Մարզահամերգայինի բեմից մոտ 90 րոպե նոստալգիա ու դրական լիցքեր փոխանցեց խումբը: You՛re My Heart, You՛re My Soul, Cheri Cheri Lady, Brother Louie, No Face, No Name, No Number… Այս ու այլ երգերը 80-ականների լավագույն հիթերն էին ու խմբի այցեքարտը: Բոլորը և դեռ մի բան էլ ավելին հնչեցին երեկ: Հանդիսատեսն անգիր էր հիշում խմբի ամբողջ ռեպերտուարն ու հավասար ձայնակցում Թոմաս Անդերսին: Ռիթմիկ հնչյունները չթողեցին, որ մարդիկ նստած վայելեն համարեգը: Ակտիվ պարում էին ոչ միայն երիտասարդներն, այլև 50 անց մարդիկ, որոնց Թոմաս Անդերսը տեղափոխել էր «ջահել տարիներ»:
Կատարումները երգիչը պարբերաբար ընդհատում էր պատմություններով: Նա հիշեց, որ վերջին անգամ Հայաստանում եղել էր 28 տարի առաջ ու հավելեց, որ երջանիկ է կրկին վերադառնալու համար. «Հրաշալի է։ Ֆանտաստիկ զգացողություններ ունեմ: Այս առավոտյան եմ հասել Հայաստան։ Ամբողջ ճանապարհին մտածում էի, որ վերջին անգամ այստեղ եղել եմ 28 տարի առաջ։ Երջանիկ եմ, որ վերադարձել եմ: Շատ բան է փոխվել, բայց ձեր սերը նույնն է մնացել»,– ասաց Անդերսը:
Խելահեղ ռոքային համերգը վայելելու էին եկել մեծ թվով այլազգիներ՝ Վրաստանից, Ռուսաստանից, Իրանից և եվրոպական այլ երկրներից: Մենահամերգի ուշագրավ դրվագներն առաջարկում ենք տեսնել BlogNews.am-ի ֆոտոշարքում:
