Tert.am-ը գրում է.
Շիրակի պետական համալսարանից հեռացված երկու դասախոսներին՝ պ. գ. թ., դոցենտ, պատմության և փիլիսոփայության ամբիոնի վարիչի պաշտոնակատար Հովհաննես Խորիկյանին և Գագիկ Համբարյանի աշխատանքի վերադարձնելու հարցով Ուսանողական խորհրդի նախագահ Արմեն Մելքոնյանը և շուրջ 50 ուսանողներ բաց նամակով դիմել են հանրապետության Նախագահ Սերժ Սարգսյանին: Նրանք պահանջում են բեկանել Շիրակի համալսարանի ռեկտոր Սահակ Մինասյանի որոշումը:
Նախագահին ուղղված բաց նամակի մեջ մասնավորապես ասված է.
«Մենք բազմիցս դիմել ենք ՀՀ ԿԳ նախարար Լևոն Մկրտչյանին, բայց մեր բողոքներն ամեն անգամ անպատասխան են մնացել։ Հերթական անգամ հայտարարում ենք դասադուլ և պահանջում.
1. Բեկանել ռեկտորի մարտի 15-ի որոշումը և անհապաղ աշխատանքի վերադարձնել Հ. Խորիկյանին ու Գ. Համբարյանին։
2. Ապահովել մարտի 24-ին կայանալիք գիտխորհրդի և հոգաբարձուների խորհրդի համատեղ ընդլայնված նիստի թափանցիկությունը, այն կազմակերպել լրագրողների, բողոքին մասնակցող ուսանողների հատուկ խմբի և Հ. Խորիկյանի ու Գ. Համբարյանի ներկայությամբ։
3. Ապահովել բուհի ֆինանսական վիճակի թափանցիկությունը և համալսարանի պաշտոնական կայքում զետեղել բուհի 2016 թվականի փոփոխված և 2017 թվականի նախահաշիվները և նույն թվականների ֆինանսական հաշվետվությունները, 2018 թվականի բյուջեի նախահաշիվները։
Պարո՛ն նախագահ, հուսով ենք, որ արդարությունը կվերականգնեք», - ասված է բաց նամակում»:
Նշենք, որ Tert.am-ն այսօր տեղեկացրել էր, որ Շիրակի պետհամալսարանի ուսանողական խորհրդի նախագահ Արմեն Մելքոնյանը նաև ստորագրահավաք է սկսել՝ աշխատանքից հեռացված դասախոսներին աշխատանքը վերականգնելու պահանջով:
Հիշեցնենք, որ մարտի 15-ին աշխատանքից ազատվել են Շիրակի պետական համալսարանի երկու դասախոսներ՝ պ. գ. թ., դոցենտ, պատմության և փիլիսոփայության ամբիոնի վարիչի պաշտոնակատար Հովհաննես Խորիկյանը և Գագիկ Համբարյանը:
Լուսանկարները՝ Անահիտ Սիմոնյանի Ֆեյսբուքյան էջից
