2018 թվականի մարտի 1-ից հակաբիոտիկ, հորմոններ ու կոդեին պարունակող դեղեր գնելու համար Հայաստանի Հանրապետության քաղաքացին պետք է դեղատոմս ներկայացնի:
Սա դեղատոմսով դեղերի վաճառքի առաջին փուլն է, երկրորդն ու երրորդը սպասվում են հուլիսին (բոլոր ներարկումային դեղերը) և հոկտեմբերին (մնացած դեղերը): Հայաստանում գրանցված 4700 անուն դեղից հոկտեմբեր ամսից առանց դեղատոմսի կվաճառվի 1060-ը:
Այս փոփոխությունները նախատեսված էին 2006 թվականին ընդունված «Դեղերի մասին» նոր օրենքով:
Դեղերի ցանկերը (դեղատոմսով, առանց դեղատոմսի և հսկվող դեղերի) հրապարակված ենառողջապահության նախարարության և ՀՀ ԱՆ «Դեղերի փորձագիտական կենտրոն»կայքում:
Կան դեղեր, որոնց բարձր չափաբաժնով տարբերակները վաճառվելու են միայն դեղատոմսով, իսկ ցածր չափաբաժին ունեցողները՝ առանց: Կան դեղատեսակներ, որոնց ներարկման լուծույթները դեղատոմսով են, հաբերը՝ ոչ:
Քաղաքացին կարող է դիմել և՛ պոլիկլինիկա, և՛ ցանկացած բժշկի, որն էլ անհրաժեշտության դեպքում հիվանդին կտրամադրի համապատասխան դեղատոմսը:
Սահմանվել է դեղատոմսի 4 ձևաթուղթ՝ թմրամիջոցների, հոգեմետ նյութերի, մեկանգամյա կամ բազմակի անգամ տրամադրվող դեղերի համար:
Թմրանյութեր ու հոգեմետ նյութեր պարունակող դեղերի դեղատոմսերն ուժի մեջ են 10 օր, իսկ միանգամյա ու բազմակի դեղատոմսերը` 6 ամիս:
Հիվանդը կարող է դեղերը գնել նաև հատով և ցանկացած դեղատնից: Բազմակի օգտագործման դեղատոմսերը հենց դրա համար են: Դրանք նախատեսված են նաև քրոնիկ հիվանդների համար:
Բազմակի օգտագործման դեղատոմսով գրված դեղի` մասնակի բաց թողնելու յուրաքանչյուր դեպքում դեղատոմսից մեկ կտրոնը կտրվում և պահվում է դեղատանը:
Այդ դեղատոմսերը համարակալվելու են, և դեղատոմսի վրա նշվելու են՝ անվճար կամ զեղչի (տոկոսի) չափը, հաշվառման մատյանի հերթական համարը:
Մինչև 2018 թվականի դեկտեմբերի 31-ը նախկին կարգով հաստատված դեղատոմսերի ձևերն ուժի մեջ են: