Կլեոպատրան եգիպտուհի էր
Ոչ. Թագուհու նախնիները՝ մակեդոնացիները՝ Բալկանների բնակիչները, որոնք հին հունարենի բարբառով էին խոսում, Եգիպտոս են եկել Ալեքսանդր Մակեդոնացու բանակի հետ միասին: Վերջինիս դաշնակից Պտղոմեոս I-ը դարձավ մակեդոնական դինաստիայի առաջին փարավոնը: Ըստ հին եգիպտական ավանդույթի՝ Պտղոմեոսի իրավահաջորդները ամուսնանում էին միայն իրենց ընտանիքի ներսում գտնվող կանանց հետ՝ ժառանգ-որդիները ամուսնանում էին իրենց քույրերի հետ: Այսպես, մ.թ.ա. 69 թվականին՝ Կլեոպատրայի ծննդյան պահին, դինաստիան կառավարում էր Եգիպտոսն արդեն շուրջ 250 տարի: Դարերի ընթացքում մակեդոնական արյունը «տարածվեց» տեղացիների մեջ ևս, սակայն պաշտոնապես դրա մասին երբեք չի հայտարարվել:
Կլեոպատրան միայնակ էր կառավարում
Ոչ. Կլեոպատրա VII-ն կառավարել է հաջորդաբար երեք տղամարդկանց հետ միասին. երկու եղբայրների՝ Պտղոմեոս XIII-ի և Պտղոմեոս XIV-ի, որոնց հետ նաև ամուսնացել է, և Հուլիոս Կեսարի որդու՝ Կեսարիոնի:
Կլեոպատրայի պատճառով զոհվեցին երկու հայտնի հռոմեացի հրամանատարներ
Այո. Հռոմի կառավարման համար մ.թ.ա. 48 թվականին Հուլիոս Կեսարին պարտվելով Գնեյոս Պոմպեոսը փախավ Եգիպտոս, որտեղ նույն ժամանակ Կլեոպատրան գահի համար պայքարում էր եղբայր-ամուսին Պտղոմեոս XIII-ի հետ: Ցանկանալով Կեսարին իր կողմում պահել՝ փարավոնը հրամայեց սպանել Պոմպեոսին: Մ.թ.ա. 30-ականներին որդեգրված Կեսար Օկտավիանոսի և հրմանատար Մարկոս Անտոնիոսի, որն ամուսնացել էր Կլեոպատրայի հետ, միջև կոնֆլիկտ տեղի ունեցավ: Օկտավիանոսը ցանկանում էր Եգիպտոսը միացնել հռոմեական տարածքներին, որի հետ, ենթադրաբար, չէր համաձայնում թագուհին: Պատերազմն անխուսափելի էր: Մարկոս Անտոնիոսը գործեց ի հաճո իր սիրեցյալի և տանուլ տվեց բոլոր մարտերը: Խուսափելու համար գերությունից և խայտառակությունից՝ նա ինքնասպան եղավ:
Կլեոպատրան աստվածուհի էր համարվում
Այո. Մ.թ.ա. III դարի կեսերին Պտղոմեոսի դինաստիայի փարավոնները գահակալության գալուց հետո սկսեցին աստվածացվել, նրանց հետ մեկտեղ նաև նրանց կողակիցները: Այդպիսինն էր հատկապես Կլեոպատրան, ով իրեն ճանաչում էր որպես Իսիդա՝ եգիպտական գլխավոր աստվածուհիներից մեկը: Անգամ դրամների վրա, որոնք հատում էր թագուհին, նա իրեն հռչակում էր որպես Նոր Իսիդա:
Կլեոպատրային Հուլիոս Կեսարի մոտ են բերել գորգի վրա
Ոչ. Այս միֆը տարածվել է ժողովրդի մեջ շնորհիվ հոլիվուդյան ֆիլմի ազդեցիկ տեսարանի, որի ընթացքում Հուլիոս Կեսարի դեմաց նախշազարդ գորգ են բացում, որի մեջ էլ Կլեոպատրան է լինում: Պատմությունն այն մասին, թե ինչպես է թագուհին Կեսարի պալատ եղբորից գաղտնի եկել՝ համոզելու, որպեսզի իրեն աջակցի իշխանության համար պայքարում, գրել է I-II դարերի պատմիչ Պլուտարքոսը: Այնտեղ թագուհու օգնականը նրան բերում է սպիտակեղենի համար նախատեսված պարկով: Սակայն արդեն XIX դարի ստեղծագործություններում այս սյուժեում գորգի հետ միասին նշվում է նաև գորգը: Հնարավոր է, որ սա հետևանքն է այն բանի, որ Պլուտարքոսի աշխատությունը թարգմանելը բավականին բարդ գործ է. Բառը թարգմանել են որպես carpet, որն ըստ Սամուել Ջոնսոնի 1768 թ. բառարանի նշանակում է «բազմագույն ծածկոց», իսկ ժամանակակից անգլերենում՝ «գորգ»:
Կլեոպատրան կաթով լոգանքներ էր ընդունում, որոնց համար կթում էին 700 այծերի
Ոչ. Գեղեցկության այսպիսի բաղադրատոմսի մաիսն վկայությունները, որոնք օգտագործել է թագուհին, հաճախ հայտնվում են հանրահայտ ինտերնետային կայքերում և հղում են կատարվում կա՛մ Հիպոկրատին, կա՛մ Պլինիոս Ավագին: Հիպոկրատն ապրել է Կլեոպատրայից գրեթե չորս հարյուրամյակ առաջ: Իսկ Պլինիոսը գրում է, որ կնճիռների դեմ կաթի լոգան առաջին անգամ ընդունել է արդեն նոր շրջանում ծնված կայսրուհի Պոպեյ Սաբինան: