Bravo.am-ը գրում է.
«Կարմիր բլուր»` այսպես է կոչվում Ելենա Արշակյանի նոր բազմասերիանոց նախագիծը, որը ATV-ի եթերում կլինի հունվարի 8-ից: BRAVO.am-ի հետ զրույցում այս անգամ որպես պրոդյուսեր եւ բեմադրող ռեժիսոր հանդես եկող Ելենան պատմել է նոր աշխատանքի մասին եւ բացառիկ լուսանկարներ տրամադրել նկարահանումներից:
«Երբ հստակեցվեց, թե երբ է ավարտվում «Եթե գտնեմ քեզ» սերիալը, սկսեցինք մտածել նորի մասին: Հանդիպեցի սցենարիստ Անահիտ Մխիթարյանի հետ, քննարկեցինք ու որոշեցինք նոր նախագծի գաղափարը, հասկացանք, որ գործող անձինք պետք է կապված լինեն իրար հետ եւ բնակվեն նույն թաղամասում»,-պատմել է ռեժիսորը եւ հավելել.«Մեր թաղամասերի անունները շատ հետաքրքիր եւ կոլորիտային են, բայց քանի որ մեր հերոսների պատմությունները բավականին խճճված են եւ շատ առեղծվածային, պետք էր գտնել մի թաղամաս, որն իր անվան մեջ կպարունակեր այդ առեղծվածը, գաղտնիքներ կունենար: Եվ քանի որ մեր սցենարիստը մոտավորապես այդ հատվածում է ծնվել, մեծացել, որոշեցինք ընտրել Կարմիր բլուրը: Այն բավական հետաքրքիր պատմություն ունի, ուրարտական քաղաք է եղել, որը գտնվել է Հրազդան գետի ձախ ափին եւ պատմամշակութային արժեք է իրենից ներկայացնում: Քաղաքի հետ կապված առ այսօր հետաքրքիր պատմություններ կան, պեղումները դեռ շարունակվում են այդ հատվածում, ներքեւի մասում թաղամաս կա, իսկ գագաթին ամրոց է եղել»:
