Առաջիկայում կներդրվի սննդի շղթայում գործունեություն իրականացնող ընկերությունների ռեյթինգավորման համակարգ, ինչպես նաև կլրամշակվի ռիսկերի գնահատման և կառավարման մեթոդաբանությունը: Այս ծրագրերը ՍԱՊԾ պետ Իշխան Կարապետյանը ներկայացրել է FAO-ի ներկայացուցիչ Ռայմունդ Յելեին:
ՍԱՊԾ մամուլի ծառայության փոխանցմամբ, ռեյթինգավորման համակարգի ներդրման նպատակն է սպառողին հնարավորություն տալ ավելի հեշտ կողմնորոշվել գնումներ կատարելիս և տեղեկացված լինել, թե որքանով է անվտանգ ու որակյալ տվյալ ընկերության արտադրանքը:
Ծրագրի գործարկումից հետո՝ ավելի ուշ, նախատեսվում է դասակարգում կատարել նաև ըստ մթերքների՝ տարանջատելով, օրինակ, օրգանական մթերքն այլ մթերքներից: Ռեյթինգավորման միջազգային փորձը Սննդմաթերքի անվտանգության պետական ծառայության մասնագետներին է փոխանցել FAO-ի փորձագետ Մայքլ Գրեյվին, որը, որպես օրինակելի տարբերակ, մանրամասնել է սննդի շղթայի օպերատորների ռեյթինգավորման դանիական փորձը: Ծառայությունն առաջիկայում արդեն կունենա ռեյթինգավորման հայեցակարգը, որից հետո կսկսի գործընթացը՝ պիլոտային տարբերակով սկզբում ռեյթինգավորելով մսամթերք արտադրող ընկերություններին:
Կարևորելով ռիսկերի գնահատման վրա հիմնված առավել նպատակային և հասցեական վերահսկողությունը՝ ՍԱՊԾ-ն այդ ուղղությամբ սերտորեն գործակցել է թե ՄԱԿ-ի պարենի և գյուղատնտեսության կազմակերպության, թե ՀՀ գիտությունների ազգային ակադեմիայի «Էկոլոգանոոսֆերային հետազոտությունների կենտրոն» ՊՈԱԿ-ի փորձագետների հետ:
FAO-ի փորձագետները ծանոթացել են ՊՈԱԿ-ի կարողություններին և հնարավորություններին, ռիսկերի գնահատմանն առնչվող օրենսդրական կարգավորումներին, անասնաբուժական և բուսասանիտարական ոլորտներում կիրառվող այն համակարգերի (RASSF, WAHIS) գործիքակազմերին, որոնք օգտագործվում են կենդանիների, սննդամթերքի ռիսկերի գնահատման և վերլուծության համար:
ՄԱԿ-ի պարենի և գյուղատնտեսության կազմակերպության փորձագետներն արդեն ներկայացրել են իրենց դիտարկումները, և մինչև տարեվերջ պատրաստ կլինի վերջնական զեկույցը, որի հիման վրա էլ մեր երկրում կիրականացվի ռիսկերի գնահատում:
