Խմորի համար
- Կարագ - 200գր
- Ձու - 2 հատ
- Ալյուր - 2 բաժակ
- Կաթ - 1/2 բաժակ
- Խմորի փխրեցուցիչ - 2թ/գ
Կրեմի համար
- Կարագ - 250գր
- Եփած խտացրած կաթ - 1 տուփ
- Մի քանի հատ ընկույզ, չամիչ՝ ըստ ճաշակի:
Փափկեցրած կարագը տրորել, ավելացնել ձվերը և հարել, մինչև միասեռ զանգված դառնա: Ստացվածին ավելացնել կաթը: Ալյուրի մեջ լցնել փխրեցուցիչը և ավելացնել խմորին, լավ խառնել: Խմորը փաթաթել պոլիէթիլենային տոպրակով և 1-1,5 ժամ դնել սառնարանը (սառնախցիկում չդնել):
Ջեռոցի ամանի մեջ փռել յուղաթուղթը, սառեցրած խմորը քերել մեծ քերիչով, լցնել յուղաթղթի վրա և 15-25 րոպե դնել 180 աստիճան տաքացրած ջեռոցը:
Ամբողջ խմորը միանգամից չդնել ջեռոցը, այլ 3-4 մասի բաժանել և այդպես թխել:
Կրեմի համար. կարագը և խտացրած կաթը լավ հարել, մինչև միասեռ զանգված դառնա: Եթե կրեմի մեջ ավելացնելու եք ընկույզ, նախապես մանր կտրտեք և ավելացրեք կրեմին: Խմորը լցնել կրեմի մեջ և լավ խառնել: Ստացված զանգվածը կոնաձև լցնել սկուտեղի վրա և 2-3 ժամ դնել սառնարանը, որպեսզի կրեմը ներծծվի: Ստացված մրջնաբույնի վրա լցնել չամիչ և զարդարել ընկույզով:
