ՀՀ Ազգային ժողովը հաստատեց «Հայաստանի Հանրապետության 2018 թվականի պետական բյուջեի մասին» օրենքների նախագիծը՝ 64 կողմ, 35 դեմ քվեարկությամբ:
Բյուջեի նախագծին կողմ քվեարկեցին «Հայաստանի Հանրապետական կուսակցություն» և «Հայ Յեղափոխական Դաշնակցություն» խմբակցությունները:
«Ծառուկյան» խմբակցության անունից վարման կարգով խոսեց ԱԺ փոխնախագահ Միքայել Մելքումյանը, ով նշեց, որ 2018-ի բյուջեի նախագիծը չի արտահայտում այն քաղաքական բովանդակությունը, ինչ իրենց խմբակցությունն ունի: Ըստ նրա, բյուջեն լուրջ հիմքեր չի հանդիսանում տնտեսական զարգացման համար, մենաշնորհների համար ազատ մրցակցային պայմաններ չեն ձևավորում:
«Մենք չենք կիսում քաղաքական պատասխանատվությունը, և միանշանակ Ծառուկյան դաշինքը դեմ է քվեարկելու բյուջեի նախագծին»,-հայտարարեց նա։
Բյուջեի քվեարկությանը ներկա էին նաև կառավարության անդամները ՀՀ վարչապետ Կարեն Կարապետյանի գլխավորությամբ:
Բյուջեի նախագծի հաստատումից հետո ծափողջյուններ եղան:
Նշենք, որ փոփոխված նախագծով պետական բյուջեի ընդհանուր եկամուտները կկազմեն 1 տրիլիոն 308 մլրդ 284 հազ. դրամ, հարկային եկամուտներից ու պետական տուրքերից ակնկալվում է ստանալ 1 տրիլիոն 248 մլրդ դրամ: Ծախսային մասը կկազմի 1 տրիլիոն 307 մլրդ դրամ, իսկ պակասուրդը գրեթե անփոփոխ է՝ 156 մլրդ դրամ:
