Tert.am-ը գրում է.
Արտակարգ և լիազոր դեսպան Արման Նավասարդյանի խոսքով՝ Ամերիկայի Միացյալ Նահանգների նախագահ Դոնալդ Թրամփի կողմից Երուսաղեմի՝ Իսրայելի մայրաքաղաք ճանաչելն աննախադեպ երևույթ էր:
Նա Tert.am-ի հետ զրույցում նկատեց՝ Թրամփի «զիգզագային քաղաքական վարքագիծը» նորություն չէ, այն քաոս է ստեղծում դիվանագիտության մեջ:
«Ես դա անվանում եմ դիվանագիտական քաոս: Չափեր կան դիվանագիտության մեջ, սակայն այս քայլով նա կարմիր գիծն անցնում է»,- ասաց նա՝ նկատելով, որ Երուսաղեմի շուրջ ստեղծված իրավիճակը կապվում է Թրամփի կողմից տարածաշրջանում տարվող քաղաքականության հետ:
Հիշեցնենք, որ դեկտեմբերի 6-ին ԱՄՆ նախագահ Դոնալդ Թրամփը հանդես էր եկել հայտարարությամբ՝ Երուսաղեմը ճանաչելով Իսրայելի մայրաքաղաք և հաստատելով ԱՄՆ դեսպանատունն այնտեղ տեղափոխելու ծրագիրը:
Եղածին մեկնաբանություն է տվել նաև ՀՀ արտգործնախարար Էդվարդ Նալբանդյանը:
Նա մասնավորապես նշել է, որ Երուսաղեմի կարգավիճակի հարցը միջազգային օրակարգի կարևորագույն խնդիրներից է և կարող է լուծում ստանալ բանակցությունների միջոցով՝ իսրայելա-պաղեստինյան հակամարտության կողմերի համար ընդունելի կարգավորման համատեքստում։ Դա կարող է ճանապարհ հարթել տևական անվտանգության և խաղաղության հաստատման համար։
«Երուսաղեմում առկա է բազմադարյա հայկական ներկայություն, հարուստ հայկական պատմամշակութային ժառանգություն։ Հայ առաքելական եկեղեցին հանդիսանում է Սուրբ վայրերի իրավատեր եկեղեցիներից մեկը: Բնականաբար, մենք ուշադրությամբ ենք հետևում Երուսաղեմին առնչվող բոլոր զարգացումներին»,-ասել է Էդվարդ Նալբանդյանը։
Թրամփի կողմից Երուսաղեմի ճանաչումը որպես Իսրայելի մայրաքաղաք, դիվանագետը շեշտեց՝ լուրջ քայլ է:
«Դա կարող է զարգանալ, բերել մեծ բախման տարածաշրջանում, մեզ պատերազմական գործողությունների, որովհետև շատ իրարամերժ ուժեր կան այնտեղ, որոնք կգնային նման քայլի, հատկապես նման իրավիճակում»,- ասաց նա:
Այս համատեքստում Արման Նավասարդյանը մատնանշեց Թուրքիայի արձագանքը: Նկատեց, որ ԱՄՆ-ի հետ լարվածության ֆոնին Թուրքիան առիթը կարող է օգտագործել: «Այնտեղ Իրանի հարց կա, նույնիսկ Սաուդյան Արաբիան անմասն չի մնա, չնայած ԱՄՆ-ի դաշնակիցն է: Կստեղծվի մի քաոսային իրավիճակ՝ «սոդոմ- գոմոր», անգամ պատերազմական իրավիճակ»,- ասաց նա:
Արման Նավասարդյանը ԱՄՆ նախագահի որոշումը չկապեց միայն Իրանի հետ հարաբերությունների վատթարացման հետ:
«Տարածաշրջանում շախմատային տախտակի վրա նոր, մեծ խաղ է սկսվել՝ նոր, մեծ քարերով, նոր պարտիաներ: Ամերիկյան այս նոր քաղաքականությունը կարող է բերել շատ լուրջ հետևանքների աշխարհաքաղաքական առումով․ Ռուսաստանի հետ լարված հարաբերություններն են այստեղ դեր խաղում: Թրամփի վերջին քայլը, կարծում եմ, ուղղված է նաև Պուտինի հայտարարության դեմ, որ նորից մասնակցում է նախագահական ընտրություններին: Բազմաշերտ խաղ է գնում, և լավ կլինի, որ այն զարգացում չունենա»,-ասաց նա:
Ամբողջական հոդվածը կարող եք կարդալ այստեղ։