Երեկ Մարզահամերգային համալիրում համատեղ համերգով ներկայացան «Capital Cities» հանրահայտ ինդի-փոփ խմբի մեներգիչ Սեբու Սիմոնյանն ու «Վիզա» ֆոլկ-ռոք բենդը: Հավատարիմ հանդիսատեսն արտիստներին ընդունեց ջերմ ու բարձր ծափահարություններով։
Mezzo production-ի կազմակերպած համերգային ծրագրի առաջին մասն անցավ ակուստիկ ու մեղեդային հնչյուններով: Սեբուն միաժամանակ և՛ նվագում էր, և՛ երգում: Համերգը մեկնարկեց Կոմիտասի «Ծիրանի ծառ»-ով ու եզրափակվեց «Ես սարեն կուգայի» ստեղծագործությամբ։ Արտիստը հպարտորեն է նշում այն մասին, որ իր երաժշտական ճաշակի ձևավորման վրա մեծ ազդեցություն է ունեցել Կոմիտասը:
Սեբուն երկու զուգերգ կատարեց Սիրուշոյի հետ․ սկզբում «Have you ever hurt somebody» երգը հնչեց Ջիվան Գասպարյան կրտսերի նվագակցությամբ, այնուհետև արտիստները կատարեցին այս ամռան հիթը՝ «Վույ աման»-ը:
Համեստ ու հանդարտ խառնվածքով լիբանանահայ երաժշտին ոգևորել էր հանդիսատեսի ընդունելությունը: Սեբուն իր տպավորությունների մասին համերգից անմիջապես հետո ետնաբեմում կիսվեց լրագրողների հետ. «Շատ լավ եմ զգում: Կարծես, հաջող ստացվեց, ժողովուրդը ջերմ էր, շատ ուրախ եմ»:
Համերգային ծրագրի երկրորդ մասն ավելի էներգետիկ էր ու լի դռայվով: Սերժ Թանկյանի հայտնի պրոդյուսինգային խմբի՝ «Վիզա»-ի, ռոքային երգերում գերիշխում էր ֆոլկ երաժշտությունը: Լոս Անջելեսում ձևավորված ռոք խմբի մեծ մասը հայեր են ՝ Էնդրյուն, Քրիսը, Շանթը, Ալեքսը և դուդուկով ռոքը համեմող կրտսեր Ջիվան Գասպարյանը, ով արդեն 15 տարի է՝ հանդես է գալիս խմբի կազմում:
Ռոքային հնչյուններն այն աստիճան էին կլանել դահլիճը, որ հանդիսատեսը նախընտրեց համերգային ծրագրի մնացած մասն անցկացնել բեմի դիմաց, ոտքի վրա: