Երեկ «Հավանա» ռեստորանային համալիրում նոր՝ «Սիրո ուժը» մյուզիքլի պրեմիերան էր: Հավանա ռեստորանային համալիրն իր գործունեության ընթացքում դարձել է իր հյուրերի ժամանցի կազմակերպման ամենաֆունկցիոնալ վայրերից մեկը: 2014 թվականից «Հավանա» ռեստորանային համալիրն իր հյուրերին ներկայացնում է պարային ներկայացումների նոր ձևաչափ՝ նվազագույնը 20 օր տևողությամբ, սյուժետային պարային համարներով: «Մուլեն Ռուժի պատմությունը», «Հնդկական երազներ», «Երազանքի փետուր», «Իսպանական կրքեր», իսկ երեկ շոու բիզնեսի և հրավիրված հյուրերն առաջինը տեսան նոր՝ «Սիրո ուժը» մյուզիքլը:
Մյուզիքլի պարային բեմադրիչը Հովհաննես Սարգսյանն է, բեմադրող նկարիչը՝ Արայիկ Գաբաջյանը, սցենարի հեղինակները՝ Արայիկ Գաբաջյանը, Նարեկ Քթոյանը, Հովհաննես Սարգսյանը, Տաթև Մանվելյանը, խոսքը՝ Ավետ Բարսեղյանի, Գրիգոր Կյոկչյանի: Մտահղացման հեղինակը և պրոդյուսերն Արայիկ Գաբաջյանն է: Դերերում՝ Կարեն Խաչատրյան, Միլենա Ոսկանյան, Հայկ Գրիգորյան, Մարիաննա Գիլոյան, Էլեն Խաչիկյան, Նունե Դեմիրճյան, Անի Նիկոյան, Արփի Բալյան:
«Սիրո ուժը» մյուզիքլը պատմում է երկու տարբեր մշակույթների ու ազգային սովորությունների բախման մասին: Մյուզիքլի ընթացքում բարձրաձայնվում են թեմաներ, որոնք մինչ այսօր արդիական են: Փոքր ազգերի սովորությունները հաճախ անհասկանալի են մեծ քաղաքների բնակիչների համար, ու հաճախ հենց իրենք՝ փոքր ազգերի ներկայացուցիչները, զոհ են դառնում իրենց սովորություններին: Նման իրավիճակում է հայտնվում «Սիրո ուժը» մյուզիքլի հերոսուհին՝ Էլիզան, ով սիրահարվում է տղայի, ով իր թափառախմբից չէ: Վերջինս՝ Մարկոն, ժամանակակից երիտասարդ է ու ապրում է մեծ քաղաքում: Նրա համար անհասկանալի են ազգային սովորույթները, արգելքներն ու փոքր ազգերի կարծրատիպերը: Մարկոն չի կարողանում հասկանալ, թե ինչու հերոսուհին, իրեն փոխադարձ սիրելով, փորձում է զոհել իր սերն ու ապագա երջանկությունը, միայն թե չխախտի գնչուական ավանդույթները: