Ռեկորդային գնով վաճառվել է երբևէ աճուրդի հանված ամենամեծ ադամանդը

168.am-ը գրում է
Ժնեւի Christie՚s աճուրդում 34 միլիոն դոլարով վաճառվել է աշխարհում աճուրդի հանված ադամանդներից խոշորագույնը: Այս մասին հայտնել է Agence France Presse-ը:

«Գրիզոնիոյի արվեստ» կոչվող շողակնի քաշը 163,4 կարատ է: Այն ստացվել է 404-կարատանոց ալմաստից, որն անցյալ տարի հայտնաբերվել է Անգոլայում: Ալմաստը դարձել է խոշորագույն բնակտորը, որը երբեւէ արդյունահանվել է այդ երկրում եւ 27-րդն՝ աշխարհում:

Քարի վրա երեք շաբաթ աշխատել է 14 ակնագործներից բաղկացած խումբը, որոնք դրանից դոմինոյի քարի չափի ադամանդ են կերտել: Դրան կցվում է մանյակ՝ ավելի փոքր չափերով զմրուխտներից եւ ադամանդներից:

Agence France Presse-ի տվյալներով՝ լոտի գինը դարձել է ադամանդների համար համաշխարհային ռեկորդ՝ 34 միլիոն դոլար, որում ներառված է միջնորդագինը, հաղորդել է ՏԱՍՍ-ը: