«Հայաստանի 2018 թվականի պետական բյուջեի նախագծով պաշտպանությանը հատկացված գումարը կտրուկ ավելացել է: Եթե 2016 թվականին պաշտպանության ոլորտին հատկացվել էր մոտ 201 մլրդ դրամ, ապա հաջորդ տարի նախատեսվում է 246 մլրդ: Աճը կազմում է ավելի քան 17 տոկոս:
Պաշտպանության նախարարության հատկացումների ավելացումն իշխանությունները շատ հեշտ են մոտիվացնում՝ խաղալով հասարակության հայրենասիրական զգացումների ու նաև վախերի վրա: Ամբողջ խնդիրն այն է, սակայն, որ Սերժ Սարգսյանի նախագահության տասնամյակում աճել է ոչ միայն բանակի, այլ նաև ուժային մյուս կառույցների ֆինանսավորումը: Նշված ժամանակահատվածում ոստիկանության ֆինանսավորումն աճել է 96 տոկոսով, պաշտպանության ֆինանսավորումը՝ 94 տոկոսով, իսկ ԱԱԾ-ինը՝ 60 տոկոսով:
Բոլոր հիմքերն ունենք ենթադրելու, որ իշխանությունների մոտիվացիան եղել է ոչ այնքան երկրի անվտանգությունն ու պաշտպանությունն ամրապնդելը, որքան իրենց ամենահուսալի հենարանների համակարգային կշռի մեծացումն ու ինստիտուցիոնալ ամրապնդումը: Այս փաստարկի օգտին է խոսում այն հանգամանքը, որ մեր բանակն, ըստ էության, անպատրաստ էր Ապրիլյան պատերազմին, ինչի համար հատուցեցին տասնյակ երիտասարդներ՝ իրենց անձնվիրությամբ ու կյանքերով:
Երբ երկրի տնտեսությունը, ըստ էության, չի զարգանում, ինչի հետևանքով էապես կրճատվում են կրթության, առողջապահության ոլորտների հատկացումները, սոցիալական ծախսերը, բայց ավելանում է ուժային սեգմենտի ֆինանսավորումը, ապա բովանդակային հարթության վրա գործ ունենք միլիտարիզացված պետության կամ ոստիկանության հետ»,-գրում է թերթը:
Նյութն ամբողջությամբ կարդացեք թերթի այսօրվա համարում:
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print
Տպել