Yerkir.am-ը գրում է.
ԱԺ գլխադասային հանձնաժողովում սկսվել է «Զինվորական ծառայության և զինապարտության» մասին օրենքի քննարկումը: ՊՆ-ից քննարկմանը մասնակցում է պաշտպանության փոխնախարար Արտակ Զաքարյանը: Նշենք, որ նույն պահին տարկետման համար պայքարող դասադուլ անող ուսանողները բողոքի ակցիա էին իրականացնում ԱԺ-ի մոտ: Ակցիայի մասնակիցներից երկուսը ցանկանում էին ներս մտնել ԱԺ և մասնակցել հանձնաժողովի քննարկմանը, սակայն դա նրանց չհաջողվեց:
Մինչ քննարկումը սկսելը «Ելք» խմբակցության պատգամավոր Արտակ Զեյնալյանը հարցրեց հանձնաժողովի նախագահ Կորյուն Նահապետյանին փոխարինող, նիստը վարող ՀՀԿ-ական Ալիկ Սարգսյանին, թե կարո՞ղ են արդյոք այդ երիտասարդները որպես հրավիրվածներ մասնակցել քննարկմանը, ինչին Ալիկ Սարգսյանը պատասխանեց, որ չեն կարող, քանի որ սա պաշտպանության հարցերի հանձնաժողովն է, և նրանք պետք է նախապես դիմեին` մասնակցելու համար: Արտակ Զեյնալյանը խնդրեց հստակեցնել, որ եթե նիստը դռնփակ ձևաչափով է, ապա դրան կարող են մասնակցել միայն հանձնաժողովի անդամները, և այն չի կարող լուսաբանվել, իսկ եթե դռնփակ չէ, ուրեմն կարող են ներկա լինել հրավիրվածներ:
«Եթե սա վերածենք միտինգի, ամեն մեկս դրա վերաբերյալ մեր կարծիքը հայտնենք, ի՞նչ եք կարծում, սա աշխատանքային քննարկում կստացվի՞»,- ասաց Ալիկ Սարգսյանը` հավելելով, որ ինքը միայն նիստի վարողն է, և այլ լիազորություններ չունի` կողմնակի մարդկանց ներս թողնելու: