Արցախի Հանրապետության նախագահ Բակո Սահակյանը հոկտեմբերի 20-ին Բրյուսել քաղաքում այցելել է Վալոնիայի խորհրդարան, որտեղ հանդիպել է պատգամավորների հետ և ներկա գտնվել Արցախի հետ բարեկամության խմբի ստեղծման հանդիսավոր արարողությանը, տեղեկացնում են Արցախի նախագահի մամուլի գրասենյակից: 

Բակո Սահակյանը շնորհակալություն է հայտնել բոլոր նրանց, ում քրտնաջան և նպատակասլաց աշխատանքի շնորհիվ հնարավոր եղավ ձևավորել այս խումբը, ընդգծելով, որ այն հանդիսանում է Վալոնիայի ու Արցախի, մեր ժողովուրդների միջև բարեկամության, փոխադարձ հարգանքի ու վստահության խորհրդանիշ և կարևոր դերակատարություն կունենա երկկողմ հարաբերությունների ու փոխգործակցության խորացման գործում:

Արցախի Հանրապետության նախագահը Վալոնիան բնութագրել է որպես Արցախի համար բարեկամ երկրամաս, Բելգիայի և Եվրոպայի կարևոր միավորումներից մեկը, ֆրանկոֆոն հանրության հանգուցային օջախը, որի հետ կան բազմաթիվ ընդհանրություններ աշխարհընկալման, արժեհամակարգի, մշակույթի և նիստուկացի մեջ:

Միջոցառման ընթացքում Բակո Սահակյանն Արցախի Հանրապետության ճանաչման գործընթացում ունեցած նշանակալի ավանդի համար «Երախտագիտություն» մեդալ է հանձնել Լյովենի կաթոլիկ համալսարանի պատվավոր ռեկտոր Բեռնար Կուլիին և բելգիացի խորհրդարանական Անդրե դե Բյուսին:  

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել