Ինչպես և սպասվում էր, ՀՀԿ-ն անպատասխան չթողեց «անաստասմիկոյանոտ» ԿԳ նախարար Լևոն Մկրտչյանի արարքը, ով վերջերս ուսման մեջ առաջադիմություն ունեցող աշակերտների հետ հյուրընկալվել էր ՀՀ նախագահի նստավայրում, որտեղ այդ աշակերտները պարգևներ և նվերներ ստացան Սերժ Սարգսյանից։ Սակայն այդ միջոցառումը սկանդալի վերածվեց, երբ պարզվեց, որ ԿԳ նախարար Լևոն Մկրտչյանը նախագահական էր տարել նաև Հրազդանի քաղաքապետի անչափահաս որդուն, ով, չունենալով վարորդական իրավունք և վարելով ծառայողական ավտոմեքենա, վրաերթի էր ենթարկել մի տղամարդու, որն ավելի ուշ հիվանդանոցում մահացել էր։ Հասարակական և քաղաքական բազմաթիվ գործիչներ պահանջեցին ԿԳ նախարարի հրաժարականը, իսկ որոշ իշխանամետ ԶԼՄ-ներ էլ Լևոն Մկրտչյանին մեղադրեցին նախագահին «подстава» անելու մեջ։
Բոլորը սպասում էին ՀՀԿ-ի պատասխանին, որն իրեն ուշացնել չտվեց։ Սեպտեմբերի 21-ին անկախության 26-րդ տարեդարձի առթիվ Եռաբլուր զինվորական պանթեոն այցելած վարչապետ Կարեն Կարապետյանից լրագրողները հետաքրքրվեցին դպրոցներում ռուսաց լեզվի դասավանդման հայեցակարգի մասին։ Կառավարության ղեկավարն ի պատասխան ասաց. «Ես շատ պարզ ձևակերպեցի՝ նման հանձնարարական չի եղել»։
Հիշեցնենք, որ օրեր առաջ ԿԳ նախարար Լևոն Մկրտչյանը հայտարարել էր, որ մշակվել է օտար լեզուների դասավանդման հայեցակարգ, որը մշակել է վարչապետ Կարեն Կարապետյանի հանձնարարականով։
Կարեն Կարապետյանի այս պատասխանից հետո Լևոն Մկրտչյանը հայտնվել է շատ վատ վիճակում։ ՀՀ վարչապետը Հայաստանում ռուսաց լեզվի մասին շատ անհանգստացող ԿԳ նախարարին պատասխանեց «Месть это блюдо, которое нужно подавать холодным» կարգախոսին համապատասխան։
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել