Aysor.am-ը գրում է.
«Սասնա ծռերի» գործով դատավոր Արտուշ Գաբրիելյանը առանց քննության է թողել նույն գործով ամբաստանյալներ Սերգեյ Կյուրեղյանի և Թորոս Թորոսյանի շահերի պաշտպան ներգրաված հանրային պաշտպան Լիաննա Գասպարյանի միջնորդությունը՝ այս քրեական գործով վարույթը կասեցնելու և Սահմանադրական դատարան դիմելու մասին:
Հանրային պաշտպան Լիաննա Գասպարյանը Aysor.am-ին տեղեկացրեց, որ և՛ ինքը, և՛ Հանրային պաշտպանի գրասենյակը ուշադրություն են դարձնելու այդ միջնորդությանը և հետևողական են լինելու, որպեսզի հարցը լուծում ստանա:
Նշենք, որ դեռևս օգոստոսի 31-ին տեղի ունեցած դատական նիստում, երբ փաստաբան Մուշեղ Շուշանյանը խուզարկության պատճառով չկարողացավ մուտք գործել նիստերի դահլիճ, դատավոր Արտուշ Գաբրիելյանը որպես ամբաստանյալներ Սերգեյ Կյուրեղյանի և Թորոս Թորոսյանի շահերի պաշտպան ներգրավեց հանրային պաշտպան Լիաննա Գասպարյանին: Եվ դա դատավորն արեց այն դեպքում, երբ ամբաստանյալները դրա վերաբերյալ դիրքորոշում չհայտնեցին, այսինքն՝ չեն ասել, թե համաձայն են կամ համաձայն չեն, որ Լիաննա Գասպարյանը ստանձնի իրենց պաշտպանությունը:
Հենց նույն՝ օգոստոսի 31-ին տեղի ունեցած դատական նիստում էր, որ հանրային պաշտպանը դատարանին միջնորդել էր կասեցնել քրեական գործի վարույթը և դիմել ՍԴ:
«Դատարանը այս քրեական գործով Կյուրեղյանի և Թորոս Թորոսյանի պաշտպան ներգրավեց Քրեական դատավարության օրենսգրքի 69-րդ հոդվածի 1-ին մասի 11-րդ կետով և նույն հոդվածի 5-րդ մասով: Գտնում եմ, որ 69-րդ հոդվածի 5-րդ մասը հակասում է ՀՀ սահմանադրության 67-րդ հոդվածի 2-րդ մասին: Միջնորդում եմ վարույթը կասեցնել, դիմել Սահմանադրական դատարան Քրեական դատավարության օրենսգրքի 69-րդ հոդվածի 5-րդ մասի համապատասխանության հարցը Սահմանադրության 66-րդ 2-րդ մասի համապատասխան լուծելու նպատակով: Խնդրում եմ միջնորդությանս վերաբերվել լուրջ և պահանջում եմ, որ այն լուծվի այս նիստում», - դատարանում հայտարարել էր Գասպարյանը:
Այն, որ դատավոր Արտուշ Գաբրիելանը առանց քննության է թողել իր ներկայացրած միջնորդությունը, հանրային պաշտպան Գասպարյանը օրինական չի համարում:
Ամբողջական հոդվածը կարող եք կարդալ այստեղ։