Իզուր չէ, որ բժիշկները խորհուրդ են տալիս շաքարը փոխարինել մեղրով: Այդ մթերքը եզակի է իր օգտակար հատկություններով՝ բարելավում է ինքնազգացողությունը, պարգևում գեղեցկություն և երիտասարդություն:
Ժամանակակից գիտությունը ապացուցել է, որ մեղրի յուրաքանչյուր կաթիլը պարունակում է մարդու առողջության համար կարևոր ավելի քան 70 նյութ: Դրանում ածխաջրերը սովորական շաքարի համեմատ ավելի հեշտ են մարսվում՝ նպաստելով մկանային ուժի պահպանմանը և նորմալ աճին: Իսկ մեղրում պարունավող ֆերմենտները խթանում են մարսողական պրոցեսները և բարելավում նյութափոխանակությունը: Սպիտակուցները մասնակցում են հորմոնների գոյացմանը, հանքանյութերը կարգավորում են նյարդային համակարգը, հյուսվածքային շնչառությունը և արյան շրջանառությունը:
Ինչու է անհրաժեշտ մեղր ուտել
1. Մեղրը ֆլավոնոիդի պարունակության շնորհիվ օրգանիզմը պաշտպանում է քաղցկեղից և սրտի հիվանդություններից: Ըստ բժիշկների՝ եթե սրտայինները 1-2 ամիս օրական օգտագործեն 50 գրամ մեղր, ապա նրանց վիճակը անպայման կբարելավվի:
2. Մեղրը բուժամիջոց է ստամոքսի և տասներկումատնյա աղիքի խոցերի, գաստրիտի և աղեստամոքսային տրակտի այլ հիվանդությունների ժամանակ: Խոցային հիվանդությունների ժամանակ խորհուրդ է տրվում քաղցած վիճակում օրը 3 անգամ խմել գոլ մեղրաջուր: Մեղրը ունի հականեխիչ ազդեցություն և արագ անցնելով աղեստամոքսային տրակտով՝ սպանում է վնասակար միկրոբները և բակտերիաները՝ նպաստելով ստամոքսի առողջացմանը:
3. Մեղրը անփոխարինելի է մրսածության դեպքում: Կարելի է այն խառնել կիտրոնի հյութի հետ և խմել: Տարածված է նաև բողկի հետ օգտագործումը: Մեծ բողկը փորում են և այնտեղ լցնում մեղր: 2-3 ժամ թողնելոց հետո այն պետք է օգտագործել ուտելուց առաջ:
4. Մեղրը օգնում է կարգավորել արյան մեջ շաքարի մակարդակը: Այն լյարդի համար կատարյալ սնունդ է, քանի որ նրանում ֆրուկտոզան և գլյուկոզան հավասար հարաբերությամբ են:
5. Մեղրը ազատում է մաշկային հիվանդություններից և պայքարում օրգանիզմի ծերացման դեմ:
6. Մեղրը հիանալի պրոբիոտիկ է: Այն բարելավում է մարսողական համակարգը և վերականգնում օրգանիզմի օգտակար միկրոֆլորան:
7. Մեղրը բնական հակադեպրեսանտ է: Ամեն առավոտ մեղր օգտագործող մարդիկ ավելի լավ են պայքարում քրոնիկ հոգնածության դեմ: Նրանք նվազ դյուրագրգիռ են և նվազ ընկալունակ տարբեր սթրեսային իրավիճակների նկատմամբ:
8. Մեղրը օգտակար է ուղեղի համար: Առավոտյան մեղր օգտագործելը ուղեղին էներգիա է հաղորդում, ինչը շատ կարևոր է ինչպես մեծահասակների, այնպես էլ երեխաների համար:
Ինչքան մեղր ուտել
Մեծահասակները կարող են օրական ուտել 60-100 գրամ մեղր, իսկ երեխաները՝ դրա կեսը: Առավոտյան հարկավոր է 1 թեյի գդալ մեղրը լուծել 1 բաժակ գոլ ջրում և խմել ուտելուց կես ժամ առաջ:
