Armsport.am-ը գրում է.
Ազատ ոճի ըմբշամարտի Հայաստանի ազգային հավաքականն օրեր առաջ վերադարձել է Կիսլովոդսկից, որտեղ Ռուսաստանի թիմի հետ համատեղ ուսումնամարզական հավաք էր անցկացնում:
ՀԱՕԿ լրատվականի հետ զրույցում հավաքականի գլխավոր մարզչի պաշտոնակատար Հաբեթնակ Կուրղինյանը նշել է, որ Կիսլովոդսկի հավաքին թիմում ընդգրկել էր հինգ ըմբիշ.
«Աշխարհի առաջնությանը մասնակցելու համար նախատեսում ենք հինգ ըմբիշ: Սակայն, թիմի վերջնական կազմը պարզ կլինի մի քանի օր անց` վերջին հավաքի ընթացքում:
Կիսլովոդսկում շատ լավ մարզումներ ենք ունեցել: Տղաները լավ մարզավիճակում են: Առաջիկա հավաքի ընթացքում կրկին կաշխատենք բուն գոտեմարտերի, տեխնիկա-տակտիկական հնարքների վրա:
Տղաները պետք է հավաքվեն և կենտրոնացնեն իրենց ամբողջ ուժերը: Ինչ վերաբերվում է Լևան Բերիանիձեին` նա այժմ քաշի հետ կապված որևէ խնդիր չունի: Այդ առումով լավագույն վիճակում է: Ինձ գոհացնում է նաև Բերիանիձեի ֆիզիկական վիճակը:
Վալոդյա Ֆրանգուլյանն աշխարհի առաջնությունում հանդես կգա իր սովորական 61 կգ քաշային կարգում: Նախորդ միջազգային մրցաշարում նա գոտեմարտել էր 65 կգ քաշում: Իսկ այդ քաշային կարգում Նարեկ Սիրունյանը դեռևս չի վերականգնվել վնասվածքից և բաց կթողնի տարվա գլխավոր ստուգատեսը»,- ասել է Հաբեթնակ Կուրղինյանը:
Ազատ ոճի ըմբիշներն աշխարհի առաջնությունից առաջ վերջին ուսումնամարզական հավաքը կանցնացնեն Օլիմպավանում օգոստոսի 10-23-ը:
