«Հունիսի 29-ին ՀՀ կառավարությունը որոշել է ստեղծել Հայաստանի զբոսաշրջության զարգացման հիմնադրամ: Կառավարության որոշման հիմնավորման համաձայն, նոր հիմնադրամը ստեղծվում է զբոսաշրջության բնագավառում մարքեթինգային պետական քաղաքականության առավել արդյունավետ իրականացումն ապահովելու նպատակով:
Նաև նշված է, որ Հայաստանի զարգացման հիմնադրամի հոգաբարձուների խորհուրդը 2017 թվականի հունիսի 13-ին որոշել է չզբաղվել զբոսաշրջությամբ: Թե կառավարության, թե Հայաստանի զարգացման հիմնադրամի հոգաբարձուների խորհրդի ղեկավարը Կարեն Կարապետյանն է: Հիմնադրամի հոգաբարձուների խորհուրդն ունի 14 անդամ, որից յոթը՝ նախարար և նախագահի ներկայացուցիչ:
Հիմնադրամում հարց լուծողը ՀՀ կառավարությունն է: Պակաս հետաքրքիր չէ այլ փաստ, հունիսի 22-ին՝ Հայաստանի զարգացման հիմնադրամի հոգաբարձուների խորհրդի «զբոսաշրջային հրաժարականից» մեկ շաբաթ անց, Ազգային ժողովն ընդունել է ՀՀ կառավարության «2017-2022 թվականների երկրի կայուն զարգացումը երաշխավորող գործունեության ծրագիրը», որտեղ զբոսաշրջությանը անդրադարձ կա, բայց խոսք չկա Հայաստանի զբոսաշրջության զարգացման հիմնադրամ ստեղծելու մասին: Անցած տարի սեպտեմբերին վարչապետ դարձած Կարեն Կարապետյանը սկսեց խոշորացում-օպտիմալացում- կրճատումներով: Ծրագրերի իրականացման գրասենյակներ՝ ԾԻԳ ու պետական ոչ առևտրային կազմակերպություններ՝ ՊՈԱԿ, միավորվեցին:
Օրինակ՝ 2016-ի հոկտեմբերին Կարեն Կարապետյանը քաղաքաշինության կոմիտեի ՊՈԱԿ-ների կրճատման մասին խոսելիս ասաց. «Տնօրեն ու բոլոր էդ ատրիբուտիկան մաքրում ենք: Կտրուկ նվազեցում է պետք ծախսերի»: Իսկ 2017-ի մայիսին խոսելով քաղաքային դպրոցների օպտիմալացման մասին՝ ասաց. «Անհրաժեշտ են կառուցվածքային և բովանդակային բարեփոխումներ թե հանրակրթական, թե միջին մասնագիտական, թե բուհական համակարգերում»:
Անցած մեկ տարում Կարեն Կարապետյանը տարբեր առիթներով հայտարարել է. «Ակնկալում ենք կտրուկ, դմփոց ռեֆորմ»: Եվ ահա, սրանից հետո Կարեն Կարապետյանը, պատկերավոր ասած, «դեմփինգային» (չշփոթել դմփոցի հետ- խմբ.) քաղաքականություն է վարում: Դեմփինգը (անգլերեն` dumping) տնտեսական-շուկայական քայլ է: Շուկայում ապրանքը վաճառում ես շատ ցածր գնով, շուկայից դուրս մղում նույն ապրանքից վաճառող այլ ընկերությունների, գրավում շուկան, հետո քիչ- քիչ բարձրացնում գինը: Սա այնքան ազնիվ քայլ չէ, ու կան երկրներ, որտեղ հակադեմփինգային տուրքեր են սահմանված:
Անցած մեկ տարում Կարեն Կարապետյանը կրճատեց իրենից առաջ՝ առանց իրեն ստեղծված ՊՈԱԿ- ներն ու ԾԻԳ-երը, բոլորին դուրս
մղեց «շուկայից» ու հիմա իր սրտով կառույցներ է ստեղծում՝ իր ուզած «գինը» սահմանում: «Տնօրեն ու բոլոր էդ ատրիբուտիկան մաքրելու, ծախսերը կտրուկ նվազեցնելու» կողմնակից կառավարությունը կարող էր Հայաստանի զարգացման հիմնադրամում նոր հաստիք բացել՝ զբոսաշրջության զարգացման ծրագրերի պատասխանատու: Կարևորը գործ արվի: Դրա փոխարեն ստեղծվում է նոր հիմնադրամ, բոլոր «ատրիբուտիկա- յով»՝ տնօրեն և այլն: Ու սա առնվազն չի բերվելու ծախսերի կտրուկ կրճատման»,-գրում է թերթը:
Նյութն ամբողջությամբ կարդացեք թերթի այսօրվա համարում:
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print
Տպել