«Armtimes.com-ին տեղեկություններ էին հասել, որ Շիրակի նախկին մարզպետ Հովսեփ Սիմոնյանին Արփի լճի ազգային պարկ ՊՈԱԿ-ի տնօրենի ժամանակավոր պաշտոնակատար նշանակելու համար, առանց պատճառի, աշխատանքից ազատել են տնօրեն Արա Պետրոսյանին: Այս տեղեկությունը Armtimes.com-ի հետ զրույցում հաստատեց նաև ինքը՝ Արա Պետրոսյանը:
Ստորև ներկայացնում ենք Արփի լճի ազգային պարկ ՊՈԱԿ-ի արդեն նախկին տնօրեն Արա Պետրոսյանի հետ մեր հարցազրույցը:
-Պարոն Պետրոսյան, այսինքն՝ հենց այնպե՞ս հայտարարեցին, որ Դուք ազատված եք տնօրենի պաշտոնից: ճի՞շտ եմ հասկանում:
-Այո: Մոտավորապես, այդպես: Բնապահպանության նախարարության աշխատակազմի ղեկավարի մի քանի ժամանոց այցից հետո, իմ երեքուկես տարվա աշխատանքը բնութագրվել է բացասական: Նրա կողմից համապատասխան զեկուցագիր է գրվել: Բնականաբար, ես իմ բացատրություններն եմ գրել աշխատակազմի ղեկավարի զեկուցագրերի վերաբերյալ, որը հաշվի չի առնվել: Ես զեկուցագրում գրված յուրաքանչյուր բան հիմնավորել եմ իմ բացատրագրով, որ սա այսպես չէ, այնպես է: Իրական պատկերը ներկայացրել եմ, բայց փաստացի հաշվի չառան և ազատեցին աշխատանքից:
-Ի՞նչ խնդիր էին արձանագրել, որ զեկուցագրեր կազմեցին:
-Հիմնարկին պատկանող շենք-շինությունները, որոնք մեր հաշվեկշռում ընդհանրապես չեն եղել՝ Արփի լճի ազգային պարկի ստեղծման օրվանից առ այսօր, իբր անարդյունավետ եմ օգտագործում: Մեղվապահական ասոցիացիայի շենքը, որը Արփի համայնքի սեփականությունն է, վերագրում են պարկին: Սեպասարի զբոսաշրջային կենտրոնը, որը ստեղծվել է Արփի լճի ազգային պարկի ծրագրի շրջանակներում և հանձնել է Սեպասար համայնքին, իբր էլի իմ ենթակայության տակ է և անարդյունավետ է օգտագործվում, իբր անգլերեն գիտեցող մասնագետ չունեմ, բայց ես երեք տարի շարունակ տուրիստներ եմ ընդունել ու ճանապարհ դրել: Դրանց համապատասխան լուսանկարները և փաստաթղթերը կան: Նշել են, որ միջազգային կառույցների հետ համագործակցությունը շատ վատ է, դոնոր կազմակերպությունները դժգոհ են, բայց իմ ձեռքի տակ և նախարարությունում կան Գերմանիայի զարգացման բանկի առաքելության փաստաթղթերը, որտեղ հստակ գրված է գոհունակություն, շնորհակալություն մեր աշխատանքի վերաբերյալ:
-Այսինքն՝ այս երեք տարիների ընթացքում ոչ մի խնդիր չե՞ն տեսել:
-Ընդհակառակն, այս տարիների ընթացքում միայն շնորհակալագրերի ենք արժանացել Գյումրու դպրոցներից, ռուս սահմանապահ զորքերից, մի շարք ՀԿ-ներից: Այս ամենին զուգահեռ շատ անհասկանալի ձևով ազատում են, դե կուսակցական խնդիրներ կան...Այս մի ամսվա մեջ փորձեցին ինձանից ձերբազատվել»,-գրում է թերթը:
Նյութն ամբողջությամբ կարդացեք թերթի այսօրվա համարում:
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print
Տպել