Asekose.am-ը գրում է.Արդեն տևական ժամանակ է, ինչ դերասան Վարդան Պետրոսյանն ազատ է արձակվել: Ըստ տեղեկությունների` ազատ արձակումից անմիջապես հետո դերասանը մեկնել է արտերկիր, մասնավորապես` Ֆրանսիա, ուր երկար տարիներ բնակվում էր իր ընտանիքի հետ: Մամուլում շրջանառվում էր տեղեկություն, որի համաձայն` Վարդան Պետրոսյանն առնվազն մի քանի տարի չի վերադառնալու Հայաստան:
Asekose.am-ն այս առիթով զրուցել է Վարդան Պետրոսյանի փաստաբան Նիկոլայ Բաղդասարյանի հետ: Վերջինս նշեց, որ արդեն երկար ժամանակ է, ինչ որևէ տեղեկություն չունի դերասանից:
«Չեմ խոսել Վարդանի հետ, որևէ տեղեկություն չեմ կարող փոխանցել: Միայն կհորդորեմ, որ այս շրջանում նրան հանգիստ թողնեն, որովհետև նման դեպքից հետո նրան հանգստություն է պետք: Անդրադարձները Վարդան Պետրոսյանի անձին հաճախ բացասական ալիք են առաջացնում»:
Նիկոլայ Բաղդասարյանը դժվարացավ պատասխանել` արդյո՞ք Վարդան Պետրոսյանին ինչ-որ չափով հաջողվել է հոգեպես վերականգնվել, թե՞ ոչ: Փաստաբանը միայն կարողացավ նշել, որ որոշ ժամանակ անց իր անձնական գործերով մեկնելու է Ֆրանսիա, որտեղ և կհանդիպի դերասանին:
Հիշեցնենք, որ ավելի վաղ Նիկոլայ Բաղդասարյանը Վարդան Պետրոսյանի` Ֆրանսիա մեկնելու վերաբերյալ ասել էր հետևյալը.
«Վարդան Պետրոսյանի մշտական բնակության վայրը Ֆրանսիան է, Փարիզը, և բնական է, որ այս որոշումից հետո նա պետք է մեկնի Հայաստանից ու միանա իր ընտանիքին»:
