Araratnews.am-ը գրում է.
Էրդողանի կառավարման ժամանակահատվածում Թուրքիան խորացրեց անջրպետը՝ սեփական պատմության հետ հաշտվելու, խորացրեց ժխտողականությունը: Այս մասին այսօր Ծիծեռնակաբերդի հուշահամալիրում լրագրողների հետ զրույցում ասաց ՀՀԿ խոսնակ, ԱԺ փոխնախագահ Էդուարդ Շարմազանովը:
Շարմազանովը չի ակնկալում, որ Թուրքիան կճանաչի Հայոց ցեղասպանությունը, սակայն նշում է, որ այն դատապարտողների թիվն ավելանում է:
«Հանուն մարդու իրավունքների պաշտպանության, մենք տեսնում ենք, որ աշխարհում ավելանում են և՛ երկրների, և՛ նահանգների, և՛ մտավորականների, և՛ քաղաքացիների, և՛ առհասարակ դատապարտողների քանակը և որակը, և ուշ թե շուտ այս Ցեղասպանությունը պետք է վերջնականապես դատապարտվի, որովհետև այլ ճանապարհ չկա։ Դատապարտողները լույսի համար մարտնչողներն են»,- հավելեց ՀՀԿ խոսնակը: