Ապրիլի 8-ից յուրաքանչյուր շաբաթ և կիրակի՝ ժամը 21:00-ին Ucom ցանցում հեռարձակվող «Արմենիա Պրեմիում»-ի եթերում կլինի «Եղնիկների կածանը» նոր` բազմասերիանոց գեղարվեստական ֆիլմը: Այն կիսով չափ հիմնված է իրական պատերազմական դեպքերի վրա. մի օդաչուի պատմություն է, ով առաջին հայացքից, թվում է, սովորական մարդ է, բայց մի ամբողջ երկինք և մի ամբողջ Հայաստան է իր հոգում պահում: BlogNews.am-ը ներկա էր ֆիլմի նկարահանմանը և ֆիքսել է հետաքրքիր դրվագները:
«Չեմ վախենա ասել, որ մենք աշխատում ենք լիամետրաժ ֆիլմի ռեժիմով և սկզբունքներով: Սա շատ բարդ ֆիլմ է: Ավելորդ համեստություն չեմ անի. մեր թիմը կարողանում է մի քայլ առաջ լինել հայկական կինոարտադրության մեջ: Հուսով եմ՝ այս ֆիլմը ևս մի նշաձող է, որ կհաղթահարենք»,- նշում է ֆիլմի ռեժիսոր Հրաչ Քեշիշյանը:
«Եղնիկների կածանը» գեղարվեստական ֆիլմի դեպքերը զարգանում են 2014 թվականից և ավարտվում 2016-ի գարնան իրադարձություններով: Գեղարվեստական ֆիլմում ներգրաված են՝ Խորեն Լևոնյանը, Աիդա Թորոսյանը, ով ժամանել է Միացյալ Նահանգներից, Հրաչյա Հարությունյանը, Մարջան Ավետիսյանը, Ռոզի Ավետիսովան, ինչպես նաև կան հրավիրված դերասաններ Վրաստանից և Մոսկվայից՝ Ալեքսանդր Պաշկովը:
«Ես փորձել եմ հավաքել, այսպես ասած, իմ «dream team»-ը, գոնե այն մարդկանց, ում վստահում եմ, ովքեր կարողանում են մտածել, հետաքրքիր աշխատել, կարողանում են ոչ միայն կերպար ստեղծել, այլև այդ կերպարին տալ մաքսիմալ զգացողություններ»:
Նյութը՝ Սիրանուշ Գրիգորյանի
Լուսանկարները՝ Կարեն Հովհաննիսյանի