Картинки по запросу սամվել բաբայանՕՐՕ դաշինքի անդամ Արմեն Մարտիրոսյանը քիչ առաջ «Երկիրն այսօրի» հետ զրույցում հաստատեց լուրը, որ ԱԱԾ-ն ձերբակալել է Արցախի Պաշտպանության բանակի նախկին հրամանատար Սամվել Բաբայանին:

ԱԱԾ-ն այս մասին պարզաբանում խոստացել է հրապարակել ավելի ուշ։

Այսօր ավելի վաղ ԱԱԾ-ն հայտարարություն է տարածել, որ  2017թ. մարտ ամսին ՀՀ Ազգային անվտանգության ծառայությունում նախնական տեղեկություններ են ստացվել ՀՀ քաղաքացիների կողմից Վրաստանի Հանրապետությունից մաքսանենգ եղանակով Հայաստանի Հանրապետություն «Իգլա» տեսակի զենիթա-հրթիռային համալիր տեղափոխելու մասին։ Ձեռնարկված քննչական գործողությունների և օպերատիվ-հետախուզական միջոցառումների արդյունքում հայտնաբերվել և առգրավվել է «Իգլա» տեսակի զենիթա-հրթիռային համալիրի արձակման խողովակ՝ «9M39» հրթիռով։

Դեպքի առթիվ 2017թ. մարտի 22-ին ՀՀ Ազգային անվտանգության ծառայության քննչական վարչությունում ՀՀ քրեական օրենսգրքի 235-րդ 2-րդ մասի և 235.1-րդ հոդվածի 2-րդ մասի 1-ին կետի հատկանիշներով հարուցվել է քրեական գործ։ Հանցանք կատարելու մեջ անմիջականորեն ծագած կասկածանքի հիման վրա երկու անձ ձերբակալվել է։

Նախաքննությունը շարունակվում է, միջոցներ են ձեռնարկվում զենքի (ռազմամթերքի) ապօրինի շրջանառությանն առնչություն ունեցած այլ անձանց հայտնաբերելու և գործի համար նշանակություն ունեցող մյուս հանգամանքները բացահայտելու ուղղությամբ։

Ոչ պաշտոնական տեղեկություններով՝ այս գործի շրջանակներում էլ ձերբակալվել է Սամվել Բաբայանը:

Նշենք, որ «Իգլա» տեսակի զենիթա-հրթիռային համակարգը նախատեսված է թռչող օբյեկտներ ոչնչացնելու համար։

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել