Մինչ սիրիական բանակն ու նրան հարող ուժերը լրջագույն հաջողություններ են արձանագրում երկրի հյուսիսում, Հալեպում, ընդդիմադիր տարաբնույթ խմբավորումներից ազատագրելով նրանց կողմից վերահսկվող՝ քաղաքի արևելյան հատվածի ավելի քան 80%-ը, զուգահեռաբար ռազմավարական նշանակությամբ ոչ պակաս կարևոր մեկ այլ ճակատում՝ Հոմս նահանգի Պալմիրայի շրջանում, կրում են կորուստներ արդեն «Իսլամական պետություն»(ԻՊ) ահաբեկչական կազմակերպության զինյալների հարձակման հետևանքով:
Ըստ մի շարք սիրիական աղբյուրների՝ ԻՊ-ի զինյալները դեկտեմբերի 8-ին համաժամանակյա հարձակում են նախաձեռնել Պալմիրայի դեմ հյուսիսային և արևմտյան ուղղություններով՝ կրկնագրոհի արդյունքում գրավելով Հուվայսիս շրջանը հյուսիսում։ Ներկայումս ակտիվ ռազմական գործողությունները շարունակվում են Ջազալ և Մահեր նավթահանքերի շրջաններում: Հարավային ուղղությամբ ևս ահաբեկչական խմբավորումը գրավել է մի քանի բնակավայր՝ սիրիական բանակին պատճառելով նաև էական տեխնիկական կորուստներ (3 տանկ և այլ զինտեխնիկա):
Նաև վերոնշյալ զարգացումները ցույց են տալիս, որ սիրիական կառավարական ուժերի համար բավական բարդ է միաժամանակյա հաջող գործողությունները, և Հալեպում արձանագրված հաջողության պատճառներից մեկն էլ այն է, որ այլ ռազմավարական նշանակության ճակատներում իրավիճակը համեմատաբար հանգիստ էր: Բացի այդ՝ հենց կենտրոնական Հոմս նահանգից էր դեպի հյուսիս տեղափոխվել սիրիական ԶՈՒ «Tiger Forces» հատուկ նշանակության ստորաբաժանումը, որն էլ, ըստ էության, հանդիսանում է Հալեպում սիրիական բանակի հարձակման առանցքային օղակը: