Մոնոպոլիստներն անցնում են «գործի»
Երբ Նիկոլ Փաշինյանը բարձր ամբիոնից հայտարարում էր, որ երկրում տարբեր խմբավորումներ վերահսկում են ներկրումները, մասնավորապես բանանի բիզնեսը, իշխանությունը «ձև էր բռնել», թե չգիտի ինչի մասին է խոսքը:
Իսկ ահա այսօր արդեն բանանի մոնոպոլիստ Միհրան Պողոսյանի մասնակցությամբ հերթական միջադեպն է հրապարակվել:
Մասնավորապես Aravot.am-ը գրում է, որ օրեր առաջ վարչապետ Կարեն Կարապետյանը հեռուստաընկերություններին տված հարցազրույցում հայտարարեց, թե որևէ ապրանքատեսակի ներկրման առումով խնդիր չկա: Ըստ կայքի՝ մի քանի օր առաջ, հիմք ընդունելով այս հայտարարությունը, գործարարներից մեկը մի մեքենա բանան է ներկրել:
Մեքենան Հայաստան մտնելուց հետո կանգնեցրել են մարդիկ, ովքեր ինչպես հետո է պարզվել, ԴԱՀԿ նախկին պետ Միհրան Պողոսյանի «մարդիկ» էին: Տեղում է եղել նաև Միհրան Պողոսյանը, ով, ներկայանալով որպես «գեներալ Պողոսյան», զգուշացրել է ներկրողին, որ այլևս նման «սխալի» չդիմի՝ առաջարկելով այս անգամ որպես բարի կամքի դրսևորում, գնել ներկրված ամբողջ խմբաքանակը:
Սցենարը մի տեսակ հայտնի էր, դաժե հետաքրքիր էլ չէր. փաստացի՝ Գեներալ Միհրանն ասում է, որ իր համար օրենք-մօրենք հետաքրքիր չէ, և ինչպես հայտնի սիթքոմում է ասվում, «հեքիաթները կողքի բաժնում են»: Հայտարարություններով ունենք այլ իրականություն, իսկ դրանցից դուրս՝ լրիվ այլ:
Ասել, որ անսպասելի բան է տեղի ունեցել, ո՛չ, ուղղակի պետությունը պետք է պայքար տանի ոչ միայն մաքսային մարմինները «մաքրելու», այլ նման խմբավորումների դեմն առնելու համար: Սա այն է, ինչի մասին տարիներ ի վեր ամբիոնից գոռում է Նիկոլ Փաշինյանը:
