Tert.am-ը գրում է.
Մեզ սպասվում է մի շարք փաստաթղթերի ընդունում, որոնք կարևոր են մեր հետագա քաղաքականությունը որոշելու համար. այսօր՝ հոկտեմբերի 14-ին, Երևանում կայացած Հավաքական անվտանգության պայմանագրի կազմակերպության (ՀԱՊԿ) Հավաքական անվտանգության խորհրդի նստաշրջանի նեղ նիստում այս մասին հայտարարեց խորհրդում 2015-2016թթ. նստաշրջանների միջև ընկած ժամանակահատվածում նախագահությունն ստանձնած Հայաստանի Նախագահ Սերժ Սարգսյանը:
«Մենք համոզված ենք, որ կառուցողականությունն ու տրամադրվածությունը, փոխադարձ օգնությունը մեզ կուղեկցեն»,- ասաց Նախագահը՝ առաջարկելով նախագահներին հաստատել օրակարգը: Նախագահը նաև տեղեկացրեց, որ նստաջրանի ավարտից հետո նախագահությունը կանցնի Բելառուսին:
Նշենք, որ Երևանում այսօր բացված Հավաքական անվտանգության պայմանագրի կազմակերպության (ՀԱՊԿ) Հավաքական անվտանգության խորհրդի նստաշրջանում նախատեսված է ՀԱՊԿ նախորդ տարվա գագաթնաժողովների որոշումների իրականացման ընթացքի, ինչպես նաև Կազմակերպությունում նախագահության ընթացքում Հայաստանի Հանրապետության կողմից առաջադրված առաջնահերթությունների քննարկումը:
Նիստի օրակարգում ընդգրկված երկու տասնյակ հարցերի շրջանակում կքննարկվեն միջազգային իրավիճակը և հավաքական անվտանգության ապահովման արդիական հարցեր, կդիտարկվեն մինչև 2025թ. ժամանակահատվածի համար ՀԱՊԿ հավաքական անվտանգության ռազմավարության և ՀԱՊԿ ճգնաժամային արձագանքման կենտրոնի ստեղծման վերաբերյալ որոշումների նախագծերը, ՀԱՊԿ գործունեության կատարելագործման, ինչպես նաև միջազգային ահաբեկչությանը հակազդեցության վերաբերյալ որոշումների իրականացումը:
Ամբողջական հոդվածը կարող եք կարդալ այստեղ
