Բուլղարիան նոր թեկնածու է առաջադրել ՄԱԿ-ի գլխավոր քարտուղարի պաշտոնում

Բուլղարիան փոխարինել է ՄԱԿ-ի գլխավոր քարտուղարի պաշտոնում իր թեկնածուին։ Նոր թեկնածու է դարձել եվրահանձնակատար Կրիստալինա Գեորգիևան։

«Մենք կարծում ենք, որ նա ավելի հաջող թեկնածու կլինի»,- Բուլղարիայի վարչապետ Բոյկո Բորիսովի խոսքերն է մեջբերում AFP-ն։

Սկզբում՝ 2016-ի փետրվարին, Սոֆիան ՄԱԿ-ի գլխավոր քարտուղարի պաշտոնում առաջադրել էր ՅՈՒՆԵՍԿՕ-ի ղեկավար Իրինա Բոկովային։

Երկուշաբթի ՄԱԿ-ի գլխավոր քարտուղարի պաշտոնի թեկնածուների նախնական քվեարկության ժամանակ Բոկովան զբաղեցրել էր միայն 6-րդ տեղը։

Ընտրապայքարի առաջատար է դեռևս համարվում Պորտուգալիայի նախկին վարչապետ Անտոնիու Գուտերեշը։

Ներկայիս գլխավոր քարտուղար Պան Գի Մունի պաշտոնավարման 10-ամյա ժամկետը կավարտվի 2016 թվականի դեկտեմբերի 31-ին։