Համեղ չիզքեյք , որը մատուցում ենք մեկ բաժակ թեյի կամ սուրճի հետ

Բաղադրիչներ

թխվածքաբլիթ - 150 գր
կակաո - 20 գր
շաքարի փոշի - 2 ճ/գդ
կարագ - 60 գր
պանիր մասկարպոնե - 450 գր
շաքարավազ - 90 գր
ձու - 2 հատ
շոկոլադ սև - 60 գր
վանիլին - 0.5 թ/գդ
թթվասեր - 0.5 բաժակ

Պատրաստման եղանակ

Թխվածքաբլիթները լցնում ենք փաթեթի մեջ, փաթեթը կապում և գրտնակով փշրում ենք:
Շաքարի փոշին, կակաոն, հալեցրած կարագն ու թխվածքաբլիթներով փշրանքը լցնում ենք ամանի մեջ և լավ խառնում:
20-22 սմ տրամագծով բացվող ձևամանի մեջ փայլաթիթեղ կամ յուղաթուղթ ենք դնում:
Շոկոլադե փշրանքը լցնում ենք ձևամանի մեջ և մակերևույթը սեղմելով հարթեցնում:
Սենյակային ջերմաստիճանի մասկարպոնեին ավելացնում ենք շաքարավազը և հարում 2-3 րոպե: Հատ առ հատ ավելացնում ենք ձվերը և յուրաքանչյուրից հետո մոտ 1 րոպե կրկին հարում, ինչից հետո ավելացնում ենք վանիլինն ու թթվասերը և ևս 1 րոպե հարում:
Պանրային զանգվածից 1/2 բաժակ առանձնացնում ենք, ավելացնում միկրոալիքային վառարանում հալեցրած մուգ շոկոլադն ու խառնում:
Շագանակագույն պանրային զանգվածը լցնում ենք կլոր գլխադրով հրուշակեղենային պարկի մեջ (գլխադրի անցքը շատ փոքր չպետք է լինի):
Թխվածքաբլիթներով զանգվածի վրա ենք լցնում պանրային զանգվածն ու մակերևույթը հարթեցնում:
Ջեռոցը մինչև 150-160 աստիճան տաքացնում ենք և հրուշակեղենային պարկի ծայրը մի քիչ ընկղմելով պանրային զանգվածի մեջ շրջաններ անում: Տաքացած ջեռոցի ներքևում եռման ջուր ենք դնում, այնուհետև դնում չիզքեյքը:
Չիզքեյքը մոտ 1 ժամ թխում ենք 150-160 աստիճան տաքացրած ջեռոցում: Ջեռոցն անջատում ենք և անջատած վիճակում թողնում ևս մեկ ժամ, որպեսզի այն սառչի: Այնուհետև սառած չիզքեյքը տեղափոխում ենք սառնարան (գիշերը սառնարանում ենք թողնում):