Տարտ եփած կրեմով և ազնվամորիով

Բաղադրիչներ

Խմորի համար՝
ալյուր - 250 գր
կարագ - 120 գր
շաքարի փոշի - 80 գր
ձու - 1 հատ
ջուր - 1 ճ/գդ
Կրեմի համար՝
կաթ - 300 մլ
շաքարավազ - 100 գր
կարագ - 100 գր
ալյուր - 50 գր
ձվի դեղնուց - 2 հատ
վանիլին - 0.5 թ/գդ
Ինչպես նաև՝
ազնվամորի - 300-400 գր (կամ ելակ)
շոկոլադ սև - 50 գր
կաթ - 2 ճ/գդ

Պատրաստման եղանակ

Պատրաստում ենք խմորը: Փափկեցրած կարագը շաքարի փոշու հետ հարում ենք: Ավելացնում ենք ձուն և 1 ճ/գդ սառը ջուրը (եթե ձուն փոքր է, ապա ևս 1 ճ/գդ ջուր ենք ավելացնում) և խառնում ենք: Աստիճանաբար ավելացնում ենք ալյուրը և շարունակում գդալով խառնել:
Խմորը լցնում ենք 26 սմ տրամագծով ձևամանի մեջ և կողքեր ձևավորելով ձեռքերով հավասարեցնում: Առնվազն 30-40 րոպեով դնում ենք սառնարանի մեջ:
Պատրաստում ենք կրեմը: Ձվի դեղնուցները, շաքարավազը, ալյուրը, վանիլինը և կաթի 1/3 մասը խառնում ենք այնքան, մինչև համասեռ զանգված ստանանք:
Մնացած կաթը լցնում ենք հաստ տակով կաթսայի մեջ, տաքացնում ենք, ավելացնում ենք դեղնուցներով զանգվածն ու լավ խառնում: Թույլ կրակի վրա, անընդհատ խառնելով եփում ենք, մինչև զանգվածը թանձրանա: Ստանում ենք շատ թանձր կրեմ: Զանգվածը վերցնում ենք կրակի վրայից և թեթևակի սառեցնում, այնուհետև ավելացնում ենք կտրատած կարագն ու խառնում մինչ վերջինս լուծվի և համասեռ կրեմ ստացվի: Պատրաստի կրեմն ամբողջությամբ սառեցնում ենք:
Խմորով ձևամանը հանում ենք սառնարանից և մի քանի տեղից պատառաքաղով ծակծկում:
Վրան յուղաթուղթ ենք դնում, իսկ վերջինիս վրա՝ որևէ ծանրություն ( լոբի կամ սիսեռ, որը պետք է ծածկի նաև տորթի կողքերը):
Դնում ենք նախապես մինչև 200 աստիճան տաքացրած ջեռոցի մեջ, թխում 20-30 րոպե, այնուհետև խմորի վրայից հանում ենք ծանրությունը և ևս 5-7 րոպե թխում: Պատրատի շերտն ամբողջությամբ սառեցնում ենք:
Շոկոլադն ու կաթը հալեցնում ենք գոլորշու վրա կամ միկրոալիքային վառարանում: Շոկոլադը վրձնով քսում ենք շերտի վրա և դնում սառնարանի մեջ, որպեսզի սառչի:
Քսում ենք կրեմը: Վրան շարում ենք ազնվամորին (սկսում ենք եզրերից): Տարտը կարող ենք անմիջապես համտեսել, բայց լավ կլինի գիշերը թողնել սառնարանում և վայելել հաջորդ օրը:
Բարի ախորժակ: