Երեկ Նիկոլ Փաշինյանը մեծ եռանդով կոչեր ու պահանջներ հնչեցրեց, որոնք չէին կարող մնալ անարձագանք ու անհետևանք: Բացի այն, որ մեկ հարվածով Նիկոլը փորձեց մյուս ընդդիմադիր գործիչներից խլել ընդդիմադիր զանգվածն ու իրեն դարձնել գլխավոր ու միակ ընդդիմություն, այլև նա միտումնավոր հետին պլան մղեց այն անձանց ու գործընթացները, որոնք հենց Խորենացի փողոցում հավաքել էին այդ մարդկանց:
Այս առիթով «Սասնա ծռեր» խմբավորման անդամ Վարուժան Ավետիսյանն ասել է. «Մեր ժողովրդի ազատագրման պայքարն է, ինքնաբուխ պայքար է, պայքարը հարուցված է մեր խմբի վճռական և կտրուկ գործողություններով և, բնականաբար, պետք է հասկանան, թե կամքի կենտրոնը որտեղ է: Պետք է հասկանանք, որ մենք գործ ունենք ժողովրդական շարժման հետ, և ոչ ոք իրավունք չունի առիթն օգտագործելու, ինչ-որ անձնական կամ կուսակցական շահին ծառայեցնելու»:
Վ. Ավետիսյանը Նիկոլ Փաշինյանին և մյուս բոլոր քաղաքական գործիչներին հորդորեց գործել ազգային ազատագրական պայքարի շրջանակներում: Հակառակ պարագայում, եթե իրենք տեսնեն այդպիսի միտում, ստիպված կլինեն իրենց ծանրակշիռ խոսքն ասելու և ամեն ինչ իր տեղը դնելու:
Սա ցույց է տալիս, որ Նիկոլը կարծես թե չի մարսելու երեկ պատրաստած շիլան: Հատկապես ՊՊԾ գնդի զինյալների համար մամուլի կետ կառուցելուց և նրանց տեղեկատվություն տարածելու հնարավորություն տալուց հետո Նիկոլն, ըստ էության, կհայտնվի զինյալների բարիկադների հակառակ կողմում: Սակայն ամենազավեշտալի իրավիճակում հայտնվում են Խորենացիի ակցիաներին մասնակցող մարդիկ, ովքեր կհայտնվեն <<իրենց վրա ստավկա կրող>> օբյեկտի կարգավիճակում. Մի կողմից զինյալներ, որոնք գնացել են ծայրահեղ քայլի ու նրանց աջակցելու համար է, որ իրենք այստեղ են ու մյուս կողմից Նիկոլ, որն ավելի ուշ է եկել հրապարակ, բայց փրկել է իրենց՝ փոշիացումից: Հարկավոր կլինի ընտրել:
