Ցանցում ինչ-որ բան է փոխվում։ Հերթական անգամ։ Կարծես թե սոցցանցերի դոմինացիայի ժամանակաշրջանը դանդաղ, բայց անցնում է։ Եվ առաջին պլան են սկսում դուրս գալ մեսինջերները։
Similarweb-ի կողմից վերջերս հրապարակված երկու ուսումնասիրություն ներկայացրին իրավիճակի քանակական պատկերը։ Փաստացի, սոցիալական ցանցերի հանդեպ հետաքրքրությունը նվազում է, մարդիկ ավելի քիչ ժամանակ են անցկացնում հիմնական սոցցանցերում։ Այսպես, անկում նկատվում է Ֆեսյբուքում անցկացրած ժամանակում՝ համեմատած 2015 թվականի հետ․
Նույն հետաքրքրության անկումը կարելի է տեսնել Ինստագրամում․
Նման անկում նկատվում է Թվիթերում և Սնեփչաթում։
Հետաքրքրության անկում է նկատվում նաև նոր օգտատերերի կողմից․ աստիճանաբար նվազում է շարժական սարքերում սոցցանցերի հավելվածների տեղադրման քանակը․
Մյուս կողմից՝ աճում են մեսինջերները՝ որպես շփման և սոցիալիզացիայի միջոց։ Մեսինջերներն արդեն իսկ կիրառվում են տարբեր ոլորտներում։ Բայց արդեն կարելի է արձանագրել, որ այս գործիքները սկսում են շատ հարցերում գրավել սոցցանցերի դիրքերը։ Այսպես, Ֆեյսբուքի մեսինջերի լսարանն այսօր հասնում է համարյա մեկ միլիարդի, և շարժական սարքերով կիրառման տեսանկյունից այն արդեն անցնում է բուն մայրական Ֆեսյբուքին։ Մեսինջերներն արդեն գործածությամբ անցել են սոցցանցերի մեծամասնությանը։
Մեսինջերների ամսական օգտվողների թիվը՝ միլիոններով։ Տվյալները՝ ըստ Statista.com-ի, 2016 թվականի ապրիլ։
Այսօր մեսինջերներից գերակշռող դեր ունեն Whatsapp-ը ու Facebook Messenger-ը. երկուսն էլ պատկանում են Ֆեսյբուքին։
Սամվել Մարտիրոսյան