Բրիտանացի ռեժիսոր Քեն Լոուչի «Ես Դենիել Բլեյքն եմ» ֆիլմն արժանացել է Կաննի կինոփառատոնի «Ոսկե արմավենու ճյուղ» մրցանակին, գրում է РИА Новости-ն:
Լոուչի ֆիլմը պատմում է այրիացած աշխատավորի մասին, ով կորցրել է գումար վաստակելու հնարավորությունն առողջական խնդիրների պատճառով:
Հիմնական մրցույթին մասնակցել է 21 ֆիլմ: Գրան-պրին ստացել է կանադացի Քսավյե Դոլանը՝ «Դա ընդամենն աշխարհի վերջն է» ֆիլմի համար:
Լավագույն ռեժիսուրայի համար ժյուրին մրցանակ է հանձնել ռումինացի Քրիստիան Մունջիուին և Օլիվյե Ասայասին:
Լավագույն սցենարի համար մրցանակը հանձնվել է իրանցի Ասղար Ֆարհադիին՝ «Forushande» ֆիլմի համար: Ժյուրիի մրցանակը հասել է բրիտանուհի Անդրեա Առնոլդին:
Լավագույն դերասան մրցանակին է արժանացել Շահաբ Հոսեյնին՝«Forushande» ֆիլմում դերակատարման համար, իսկ լավագույն դերասանուհի` Ժաքլին Խոսեն՝ «Ma Rosa»-ում դերակատարման համար։
Կաննի կինոփառատոնն անցկացվել է Ֆրանսիայում մայիսի 11-22-ը: