Tert.am-ը գրում է.
Թուրքիայի քրդամետ «Ժողովուրդների դեմոկրատիա» կուսակցության հայ պատգմավոր Կարո Փայլանը հայտարարել է, որ իշխող «Արդարություն և զարգացում» կուսակցության ներկայացուցիչները կանխամտածված իրեն թիրախ են ընտրել ծեծկռտուքի ընթացքում։
«Կարոն այստեղ է, Կարոն այստեղ է»,-միմյանց ձայն են տվել նրանք՝ ցանկանալով Լինչի դատաստանի ենթարկել նրան։
Bianet-ին տված հարցազրույցում Փայլանն ասել է, որ 10-15 հոգանոց խումբը փորձել է դատաստանի ենթարկել իրեն, հարձակումը կանխամտածված է եղել և պայմանավորված է այն հանգամանքով, որ ինքը իրավունքները պաշտպանող հայ է։
«Ուղղակի թիրախ էի դարձել և 20-30 վայրկյանում ավելի քան 100 ոտքի և բռունցքի հարված ստացա։ Նրանք ատելություն, ռասիզմ պարունակող խոսքեր էին ասում»,-պատմել է պատգամավորը՝ ընդգծելով, որ այդ ամենն արվել է իր հայ լինելու պատճառով։
«Իրենք ցանկանում են իրենց հավատարիմ հայ տեսնել։ Իրավունքի համար պայքարող հայ լինելու պատճառով էի թիրախ դարձել ու «լինչի դատաստանի» փորձի ենթարկվում»,-ասել է նա՝ որպես ապացույց պատմելով, թե ինչպես էին նրանք միմյանց ուղղորդում՝ ցույց տալով «Կարոյի տեղը»։