Tert.am-ը գրում է.
Արցախին անհրաժեշտ բժշկական նշանակության պարագաներով և սարքավորումներով աջակցելու նպատակով այսօր «Առաքելություն արևելք» դանիական մարդասիրական օգնության կազմակերպության տնօրեն Քիմ Հարցների և նույն կազմակերպության հայաստանյան մասնաճյուղի տնօրեն Ռաֆի Դուդակլյանը հանդիպել են ՀՀ առողջապահության նախարար Արմեն Մուրադյանին: Այս մասին տեղեկանում ենք ՀՀ ԱՆ մամուլի ծառայությունից։
«Մենք անցյալում ունեցել ենք Հայաստանի հետ աշխատելու փորձ: Մասնավորապես 1993-1997 թվականներին աջակցության աշխատանքներ ենք իրականացրել Արցախում, իսկ 1997-2004-ին Սյունիքում` տրամադրելով սնունդ և հագուստ, այլ օգնություն պատերազմական գործողություններից տուժածներին»,- ասաց կազմակերպության տնօրենը` ընդգծելով, որ այս անգամ ուշադրության կենտրոնում են բժշկական օգնության հարցերը:
Հանդիպման ավարտին ՀՀ առողջապահության նախարար Արմեն Մուրադյանը բարձր գնահատեց կազմակերպության ներկայացուցիչների` Արցախին աջակցելու պատրաստակամությունը: Ձեռք բերվեց առկա կարիքները գնահատելու և հետագա աշխատանքները համակարգելու պայմանավորվածություն:
