Tert.am-ը գրում է.
ԱԺ «Հանրապետական» խմբակցության պատգամավոր, տնտեսական հարցերով մշտական հանձնաժողովի անդամ, նախկին վարչապետ Խոսրով Հարությունյանը, Tert.am-ի հետ զրույցում անդրադառնալով Հայաստանի արտաքին պարտքին, որը եկող տարվա բյուջեում մոտենալու է ՀՆԱ-ի 50 տոկոսին, ասաց, որ այն այդքան մտահոգիչ չի համարում:
«Ընդհանրապես արտաքին պարտքը որպես տնտեսագիտական գործիք իր էությամբ մտահոգիչ չէ , ավելին՝ դա շատ պետությունների կողմից արդյունավետ օգտագործվում է, որպեսզի կարողանան այնպիսի խնդիրներ լուծել, որոնց համար իրենց բյուջետային կարողությունները բավարար չեն»,-ասաց նա և նկատեց, որ շատ երկրներ կան, որոնց արտաքին պարտքը գերազանցում է նույնիսկ իրենց համախառն ներքին արդյունքը:
«Հետևաբար՝ արտաքին պարտքը այդքան վտանգավոր չէ, և ոչ մի դրամատիկ բան չկա դրա մեջ։ Շատ ավելի կարևոր է արտաքին պարտքի սպասարկման կարողությունները: Այսինքն՝ շատ ավելի կարևոր է, թե արդյոք պետությունը, որը վերցնում է արտաքին պարտք և արտաքին վարկառուի հանդեպ ստանձնում պարտավորություններ, ունակ է այդ պարտավորությունները կատարել»,-ասաց Խոսրով Հարությունյանը և նկատեց, որ առ այսօր ՀՀ-ի տնտեսական կարողությունները բավարարել են պարտքը մարելուն:
«Այսօրվա դրությամբ Հայաստանի Հանրապետությունը իր վարկատուների առաջ հայտնի է, որպես շատ կարգապահ և պատասխանատու վարկառու, եթե մենք այդպիսի վարքագիծ չդրսևորեինք, մեզ ոչ մեկը պարտք չէր տա, եթե նույնիսկ մեր պարտքի չափաբաժինը լիներ ոչ թե 45 տոկոս, այլ 15 տոկոս»,-ասաց նա:
