Tert.am-ը գրում է․
Ազգային ժողովի «Հանրապետական» պատգամավոր Գագիկ Մինասյանը կոռեկտ չի համարում այս պահին խոսել ԵՏՄ-ից Հայաստանի ակնկալիքների մասին:
«ԵՏՄ-ից ակնկալիքների մասին խոսելիս պետք է հասկանալ, որ ակնկալիքների ծնունդն ու դրանց մասին քննարկումները տեղի են ունենում մի իրողության մեջ, որն այսօր էապես փոխվել է»,– ի պատասխան Tert.am–ի հարցին ասաց պատգամավորը՝ ավելացնելով, որ 2013 թ. սեպտեմբերին 3-ին չկար ուկրաինական թնջուկը:
«Հետևաբար, կոռեկտ չէ խոսել ակնկալիքների մասին, որովհետև դրա մեջ մտավ մի գործոն, ո՛չ տնտեսական, ո՛չ ֆինանսական, այլ զուտ քաղաքական, բայց այդուհանդերձ, ինչ կլիներ եթե մենք չանդամակցեինք ԵՏՄ-ին: Կլիներ այն, ինչ եղավ այն երկրների, որոնք տնտեսական համագործակցություն չունենք Ռուսաստանի հետ»,– ասաց նա:
Այսինքն`ըստ հանրապետական պատգամավորի, այդ երկրները կրում են ինչպես Եվրոպայի հետ սերտ համագործակցության հետևանքով վնասները, բայց չունեն ՌԴ-ի հետ տնտեսական համագործակցության առավելությունները:
Հանրապետական պատգամավորն ասում է, թե կյանքը ցույց տվեց, որ իրենց «և, և»-ի մոտեցումը հաղթանակեց: Ու հաղթանակեց բավականին մեծ ցավ պատճառելով այն բոլոր քաղաքական, որոնք գնացին «կամ, կամ»-ի ճանապարհով:
Ըստ Գագիկ Մինասյանի` 21-րդ դարում «կամ, կամ»-ը, առհասարակ, անընդունելի մոտեցում է, որը «Արևելյան գործընկերության որոշ երկրների մոտ» հանգեցրեց իրական ողբերգությունների: