Tert.am-ը գրում է.
ԱԺ «Հանրապետական» խմբակցության պատգամավոր, ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանն այսօր մամուլի ասուլիսին անդրադառնալով 2016 թվականի պետական բյուջեի նախագծին, ասաց, որ այն կազմված է մի իրողությունների հիման վրա, երբ տարածաշրջանից գալիս են ոչ դրական զարգացումներին նպաստող ազդակներ և դրանց հիմքում քաղաքական գործոններ են, որոնք դժվար են կանխատեսել:
Գագիկ Մինասյանը չի կարծում, թե մյուս տարի ավելի վատ ենք ապրելու: Նա նշեց, որ տարիներ շարունակ գնաճի նկատմամբ թոշակառուների թոշակի բարձրացումը առաջանցիկ աճ է ապահովել:
Անդրադառնալով ԵԽԽՎ-ում հակահայկական զեկույցի անցկացման փորձերին և մեր պատվիրակության աշխատանքներին՝ Գագիկ Մինասյանն ասաց. «Մենք հնարավորությունների առումով բավական համեստ ենք այն ուժերի նկատմամբ, որոնց հետ ունենք տևական խնդիրներ»: Նա նկատեց, որ զեկույցը դեռևս վերջնական չի և պետք է ամեն ինչ անենք, որ դա չդառնա որոշում:
Նա նշեց, որ գիտեն, թե ովքեր են կողմ և դեմ քվեարկել այդ դեստրուկտիվ կարծիքին: «Մենք պետք է ցույց տանք, որ կաշառելով ճշմարտություն ձեռք չես բերի»,- ասաց նա:
Ինչ վերաբերում է բոյկոտին, պատգամավորն ասաց, որ բազմաթիվ գործիքակազմի հնարավորություններից մենք պետք է ընտրենք ամենաարդյունավետը: