Tert.am-ը գրում է.

ԱԺ-ում ՀՀ նախագահի ներկայացուցիչ Վարդան Պողոսյանը Tert.am-ի հետ զրույցում ամփոփելով սահմանադրական փոփոխությունների գործընթացը` մշակման տարբեր փուլերից մինչև հոկտեմբերի 5-ի քվեարկություն, նշեց, որ այն համեմատած օգոստոսի 21-ի հետ, բազմաթիվ բովանդակային փոփոխությունների է ենթարկվել` բազմաթիվ քաղաքական  ուժերի ու կազմակերպությունների առաջարկների հիման վրա: Ինչ վերաբերում է դժգոհությանը, որ նախագիծը վերջին պահին շատ էր փոխվել, նշեց. «Հիմա, եթե նայենք այդ տրամաբանությամբ, երբ ՀՀ նախագահը չի ընդունում որևէ առաջարկ, ասում են` «որևէ մեկի կամքը չարտացոլվեց», ամեն ինչ արհամարհվեց, հիմա եթե գնացել ենք հնարավորինս լայն  փոխզիջումների ու հնարավորինս լայն քաղաքական համաձայնությունների, էլի դժգոհություններ են առաջանում»:

-Պարո՛ն Պողոսյան, երեկ տեղի ունեցավ սահմանադրության փոփոխությունների նախագծի քվեարկությունը: Բավարարվա՞ծ  եք գործընթացից:

-Այո: Միանշանակ, որովհետև իսկապես բովանդակային լայն քննարկումներ տեղի ունեցան, ԱԺ-ում բազմաթիվ առաջարկներ ներկայացվեցին, որոնց զգալի մասն արտացոլվեց նախագծում:

-Երեկ ԱԺ պատգամավոր Խաչատուր Քոքոբելյանը, ով չքվեարկեց, դժգոհեց, որ վերջին պահին բազմաթիվ փոփոխություններ են կատարվել,  կոչ արեց հետաձգել քվեարկությունը: Սա նոր բան չէ, և շատ պատգամավորներ դժգոհում են, որ կարևորագույն փաստաթղթերը մեր երկրում ընդունվում են «շըփ-թըփ» ռեժիմով:

- Պարզապես շահարկումներ են, «Շըփ-թըփ» ռեժիմ երբեք չի եղել այդ գործընթացում, այն երկու տարի է, ինչ սկսվել է  և այդ առումով ամեն ինչ եղել է շատ թափանցիկ: Հիմա, եթե նայենք այդ տրամաբանությամբ, եթե ՀՀ նախագահը չի ընդունում որևէ առաջարկ, ասում են` «որևէ մեկի կամքը չարտացոլվեց», ամեն ինչ արհամարհվեց, հիմա եթե գնացել ենք հնարավորինս լայն  փոխզիջումների ու հնարավորինս լայն քաղաքական համաձայնությունների, էլի դժգոհություններ են առաջանում: Իրականում, ցավոք սրտի,  ԱԺ կանոնակարգը որևէ այլ հնարավորություն թույլ չէր տալիս, և ուրիշ հնարավորություն չկար:

-Պնդո՞ւմ եք, որ հնարավորինս շատ առաջարկներ են տեքստում ներառվել:

-Եթե համեմատում ենք օգոստոսի 21-ի տեքստը և երեկվա ընդունվածը, իսկապես, բազմաթիվ բովանդակային փոփոխություններ են տեղի ունեցել:

-Պարո՛ն Պողոսյան, սահմանադրական փոփոխությունների  հույժ  քաղաքական հարցի  պարագայում անհասկանալի է, երբ քվեարկում են «ձեռնպահ», ոչ «կողմ» կամ «դեմ», քանի որ ամեն ինչի նկատմամբ կարելի է չեզոք, ապաքաղաքական դիրքորոշում ունենալ, բայց ոչ Սահմանադրության:

-Ձեռնպահների առումով, եթե չեմ սխալվում, ՕԵԿ-ում կային, իրենք իրենց դիրքորոշումը բացատրեցին, իրականում մենք իրենց առաջարկները շատ մեծ չափով հաշվի ենք առել, բայց ճշմարտություն է  նաև այն, որ բոլոր առաջարկները հաշվի չեն առնվել, ինչին  պետք է նորմալ վերաբերել: Եվ չեմ կարծում, որ իրենց դիրքորոշումն ապաքաղաքական էր, որովհետև իրենք սահմանադրական նախագծում առաջարկված ինչ-որ դրույթներ են տեսնում, որոնք, իրենց կարծիքով, դրական են, բայց նաև ունեն այլ առաջարկներ, որոնք արտացոլում չեն գտել և, երևի, իրենց համար, դա շատ կարևոր է

-Պարո՛ն Պողոսյան, ի վերջո, ի՞նչ տրամաբանությամբ ընդունվեցին կամ չընդունվեցին առաջարկները:

-Արտացոլված էին բոլոր հիմնական այն առաջարկները, որոնք ընդունելի էին ՀՀ Նախագահի համար:

-Իսկ ի՞նչ ընթացակարգով էիք աշխատում, պարբերաբար ճշտում էիք, որ մասն է Նախագահի համար ընդունելի, որը` ոչ:

-Բնականաբար, նախագծում օգոստոսի 21-ի նախագծի հետ համեմատած ցանկացած փոփոխություն համաձայնեցվում է ՀՀ նախագահի հետ, որովհետև դա  նրա, ոչ թե սահմանադրական հանձնաժողովի կամ մեկ այլ անձի առաջարկությունն է: Բնականաբար, ինքը պետք է տեղյակ լինի բոլոր այդ փոփոխությունների մասին, իր համաձայնությունը պետք է լինի, այլապես սահմանադրական նախաձեռնություն ցուցաբերողի կամքը հաշվի չի առնվի:

-Մի շարք  դրույթներ  Սահմանադրության տեքստից տեղափոխվեցին  Ընտրական օրենսգիրք, քանի որ այդ կարգավորումները, լուծումները թողեցիք, այսպես ասած, հաջորդիվ:  Նախ, շարունակում եք պաշտպանել ձեր այդ տեսակետը, և երկրորդ,  արդյոք ԸՕ-ում սահմանադրական փոփոխությունների հանձնաժողովի անդամների, սահմանադրագետների փոփոխությունը պետք չի գալու հենց այն պատճառով, որ Սահմանադրության տեքստից սա տեղափոխվել է օրենքի մշակման դաշտ` պատգամավորների գործունեության տիրույթ:

- 89-րդ հոդվածի հետ կապված  մեր սկզբնական մոտեցումն այն էր, ո որ հիմնական գծերը, հնարավորինս ամբողջական,  ամրագրվեն Սահմանադրության մեջ: Բայց այդ մոտեցումն, ըստ էության, ընկալելի չէր Վենետիկի հանձնաժողովի կողմից: Մենք իրենց հետ քննարկումներ ծավալեցինք և  համատեղ եզրահանգման եկանք, որ ամբողջությամբ դա համատեղելն իսկապես կարող է Սահմանադրության տեքստը ծանրաբեռնել, մենք կունենանք մինի ընտրական օրենսգիրք Սահմանադրությունում, և եկանք փոխադարձ համաձայնության, ուր արտացոլվում է միայն այն, ինչը բացարձակապես անհրաժեշտ է Սահմանադրության մակարդակով ամրագրելու տեսանկյունից: Իսկ արդեն  ԸՕ-ի գործընթացը այլևս չի մտնում սահմանադրական փոփոխությունների հանձնաժողովի գործունեության ու նաև իմ իրավասությունների մեջ:

-Պարո՛ն Պողոսյան, հանրաքվեի նախընտրական շտաբ պետք  է ձևավորվի, իրականացվի քարոզչություն, ի՞նչ ժամկետներում, ինչպե՞ս:

-Դրա վերաբերյալ որևէ տեղեկություն չունեմ:

-Ձեր առաքելությունն ԱԺ-ում ավարտվե՞ց,

-Այո:

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել