Tert.am-ը գրում է.
Սահմանադրական փոփոխությունների նախագծի շուրջ առկա կոնսենսուսը` զուտ թվային պատկերով տեսնելու հնարավորություն հանրությունը կունենա երկուշաբթի`նախագծի քվեարկության ժամանակ՝ էլեկտրոնային լուսատախտակին:
Tert.am-ի հետ զրույցում մեկնաբանեց ԱԺ պետաիրավական հանձնաժողովի նախագահ Հովհաննես Սահակյանը` արձագանքելով «Ոչ»-ի ճակատի հանրահավաքին արված այն հայտարարությանը, որ սահմանադրական նախագծի շուրջ կոնսենսուս հնարավոր չէ ապահովել «Հայկ Բաբուխանյանով ու Արտաշես Գեղամյանով», այսինքն` նրանց կուսակցություններով:
«Կոնսենսուսը մեր լսումներին մասնակցած 80-ից ավելի կազմակերպությունների մասնակցության հայտն էր, կոնսենսուսը այն հարյուրավոր առաջարկներ էին, որ ներկայացվել են սահմանադրական փոփոխությունները նախապատրաստող հանձնաժողովին, կոնսենսուսը այս լսումներին շուրջ 5 տասնյակ ելույթներն էին, կոնսենսուսը ԱԺ լիագումար նիստի ընթացքում բուռն, կոնստրուկտիվ, ջերմ մթնոլորտն էր»,- ասաց Հովհաննես Սահակյանը:
Հիշեցնենք, որ երկուշաբթի «Ոչ»-ի ճակատին հարող ուժերը Ազատության հրապարակից շարժվելու են դեպի ԱԺ` ճնշում բանեցնելու համար պատգամավորների վրա: Նաև երեկ ասվել էր, որ ով կողմ կքվեարկի, ուրացող է:
Հանրապետական պատգամավորը, ի պատասխան ասաց, որ եթե մարդը «ոչ»-ի ճակատից է, իր գործն է, սակայն պետք չէ այլ տեսակետ ունեցողին որակումներ տալ:
Հովհաննես Սահակյանը երեկ լրագրողների հետ զրույցում նշել էր, որ անցած քառօրյայում հնչած առաջարկությունների 70-80 տոկոսը հաշվի է առնվել: Սակայն այսօր մեզ հետ զրույցում նա նշեց, որ խոսքը ոչ թե քանակական ցուցանիշների մասին է, այլ բոլոր այն սկզբունքային առաջարկությունների, որոնց շուրջ եղել են սկզբունքային առարկություններ ու առաջարկներ:
Խոսքը կայուն մեծամասնության, երկրորդ փուլին անցնելու դրույթներին է վերաբերում:
Մասնավորապես. «Երկրորդ փուլ կանցկացվի` իրավիճակից ելնելով»-ը, կձևակերպվի «Կարող է անցկացվել»:
Այս, ինչպես նաև պատգամավորների թվի ամրագրման և հարցը թողնված է Ընտրական օրենսգրքին:
