Tert.am-ը գրում է.
ՄԱԿ-ի Գլխավոր ասամբլեայի նիստին մասնակցելու համար Նյու Յորքում գտնվող Ֆրանսիայի նախագահ Ֆրանսուա Օլանդը չի բացառել, որ կքննարկեն Թուրքիայի և Սիրիայի ընդդիմության առաջարկով Սիրիայի հյուսիսում ոչ թռիչքային գոտու ստեղծման հարցը։
Ինչպես տեղեկացնում է թուրքական Milliyet թերթի կայքը, Օլանդը նշել է, որ Ֆրանսիայի արտգործնախարար Լորան Ֆաբիուսն առաջիկա օրերին հանդիպումներ կանցկացնի՝ գործընկերների տեսակետները ճշտելու, այդ տարածքի սահմանները որոշելու և անվտանգության ապահովման հարցը լուծելու համար։
Նյու Յորքում կայացել է Թուրքիայի վարչապետ Ահմեթ Դավութօղլուի ու Ֆրանսիայի նախագահ Ֆրանսուա Օլանդի հանդիպումը։
Օլանդը նշել է, որ անվտանգության գոտու ստեղծման դեպքում այդտեղ կարող են տեղակայվել փախստականները, և ՄԱԿ-ի Անվտանգության խորհրդի որոշմամբ՝ այդ շրջանը կարող է լեգիտիմություն ձեռք բերել։
Օլանդը խոսել է նաև Սիրիայի նախագահ Բաշար ալ-Ասադի մասին ու ասել. «Իրանն ու Ռուսաստանը Սիրիայի հակամարտության լուծման մաս դառնալ են ուզում։ Այդ երկրների հետ աշխատելն անհրաժեշտ է, սակայն նրանց պետք է ասենք, որ խնդրի լուծումն առանց Ասադի պետք է լինի։ Ասադը Սիրիայի խնդիրների աղբյուրն է և լուծման մաս լինել չի կարող»,-ասել է նա։
Ավելի վաղ Դավութօղլուն ասել էր, որ փախստականների ճգնաժամի հաղթահարմանը կնպաստի Սիրիայի հյուսիսում անվտանգության գոտու ստեղծումը։
