Tert.am-ը գրում է.
«Սդղի գյոլ» կոչվող տարածքում Զաքարյան եղբայրների առողջությանը վնաս հասցնելու համար կալանավորված՝ Սյունիքի մարզպետ Սուրիկ Խաչատրյանի որդու` Տիգրան Խաչատրյանի պաշտպան Արմեն Մելքոնյանը այս պահին որևէ մեկնաբանություն չունի տուժող Զաքարյանի հոր հայտնածի կապակցությամբ, որ ինքը ստում է, քանի որ որդին 2 ամիս Հայաստանում չէ, ուստի չէր կարող բացատրություն տալ և չբողոքել Տիգրան Խաչատրյանի դեմ:
«Երկու-երեք օրվա ընթացքում մեր միջնորդությունը կքննարկվի: Հիշեցնեմ, որ Արաբկիր Քանաքեռ –Զեյթուն դատարան միջնորդություն ենք ներկայացրել, նաև Վերաքննիչ բողոք ունենք, երբ երկու-երեք օրից կքննարկվի, այն ժամանակ ես կխոսեմ: Հիմա ոչ մի բան չեմ ասում»,- Tert.am-ին ասաց Արմեն Մելքոնյանը:
Հիշեցնենք, որ երեկ Արմեն Մելքոնյանը Tert.am-ին հայտնել էր, որ Տիգրան Խաչատրյանի դեմ տուժողները ցուցմունք չեն տալիս, ավելի ճիշտ ` հայտնում են, թե Տիգրան Խաչատրյանը ծեծի չի ենթարկել իրենց, ինչի հիման վրա Տիգրան Խաչատրյանին ազատ արձակելու միջնորդություն է ներկայացրել։
Սակայն ավելի ուշ տուժող Հարություն Զաքարյանի հայրն ասել էր, որ որդին 2 ամիս է, Մոսկվայում է և, հետևաբար, չէր կարող նման բացատրություններ տալ և մասնակցել առերեսումներին, ինչի մասին հայտնել էր Արմեն Մելքոնյանը: