Tert.am-ը գրում է.

ՀՀ Ազգային ժողովի նախագահ Գալուստ Սահակյանը Գիտելիքի օրվա առթիվ ուղերձ է հղել. տեղեկացնում է ՀՀ ԱԺ հասարակայնության հետ կապերի բաժինը:

ՀՀ ԱԺ նախագահի շնորհավորական ուղերձում ասվում է.
«Սիրելի՛ աշակերտներ, ուսուցիչներ, ուսանողներ, դասախոսներ, ծնողներ, շնորհավորում եմ ձեզ Գիտելիքի օրվա և ուսումնական տարվա մեկնարկի առթիվ:

Մենք կրթությանն ու դպրոցին վերաբերվում ենք որպես մեր արժեհամակարգի հիմնասյան, որպես ինքնակազմակերպման հզոր միջոցի, որպես ինքնապաշտպանական և, միաժամանակ, հաղթանակող զենքի, զենք, որով արժանապատվորեն ստեղծել ենք մեր պատմությունն ու բարեհաջող անցել ժամանակի շրջափուլերով:

Այսօրվա ժամանակը բացառություն չէ իր մարտահրավերներով: Դպրոցում ուսուցչի առաջնորդությամբ մեկնարկում է դրանք հաջողությամբ հաղթահարելու դասընթացը՝ գիտելիքի ձեռքբերմամբ, քաղաքացիական գիտակցության, ազգային արժանապատվության, հայրենիքը սիրելու այբուբենի ուսուցանմամբ, դասընթաց, որն ավելի հաստատուն և հիմնավոր տեսք է ստանում արդեն բուհական միջավայրում, զինծառայության մեջ, աշխատանքային գործունեության ընթացքում: Դպրոցի ընտանեկան ջերմության մեջ է թրծվում այն գիտելիքը, որը հետո որպես հաղթաթուղթ ողջ կյանքի ընթացքում ուղեկցում է յուրաքանչյուրիս՝ ճանապարհ ցույց տալով, դռներ բացելով, բարձունքի հասցնելով: Այդ հաղթաթղթի հետագա հաջողակությամբ և արդյունավետ օգտագործմամբ պայմանավորվում է մարդու ճակատագիրը, պետության ու հասարակության վաղվա օրը, դրա գործուն օժանդակությամբ է գրվում երկրի ու ժողովրդի պատմության էջը:

Մեր յուրահատուկ հարստությունն են ազգային դպրոցի ընդգրկուն և շատ դեպքերում անգերազանցելի պատմությունը, անձնվեր ու հաճախ նաև անձնազոհ ուսուցչի կերպարը, որոնք ծնունդ են տվել հայրենիքի պաշտպան խիզախ զինվորին ու հայրենիքի դեմքը պարզերես անող գիտնականին, հայրենիքի շահերը պաշտպանող դիվանագետին ու հայրենի հողը շենացնող հողագործին: Այն ոչ միայն մեզ հպարտություն պարգևող անցյալն է, այլև ավանդների շարունակություն հանդիսացող ներկան և հուսալիության ամուր հիմքեր ունեցող ապագան, որը գտնվում է աշակերտի և ուսուցչի, ուսանողի և դասախոսի, մանկապարտեզի դաստիարակի ու նրա սանի, մեզնից յուրաքանչյուրի ձեռքում:

Ամեն ուսումնական տարվա սկիզբ նշանակում է սերունդների մուտք դեպի կրթական հաստատություններ, իսկ մասնավորապես առաջին դասարանցիների և առաջին կուրսեցիների համար՝ մուտք դեպի նոր աշխարհ ու նոր միջավայր: Առանձնահատուկ ցանկանում եմ շնորհավորել հենց նրանց, ինչպես նաև իրենց առաջին դասն անցկացնող մանկավարժներին՝ մաղթելով այս օրվա խորհրդի նման լուսավոր ճանապարհ՝  ձեռքբերումներով լեցուն:

Թող խաղաղությունը, հաջողությունն ու լավատեսությունն ուղեկցեն բոլորիդ՝  երաշխավորելով բարեկեցիկ ու երջանիկ կյանք ավելի ապահով և զարգացած Հայաստան հայրենիքում»:

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել